The Guardian باسىلىمىنىڭ حابارلاۋىنشا، وقيعا 13 قازاندا ەلدىڭ سولتۇستىك-باتىسىنداعى اردەبيل قالاسىندا بولعان. يران ۇستازدارى كاسىبي قاۋىمداستىعى ۇيلەستىرۋ كەڭەسىنىڭ مالىمەتىنشە، سول كۇنى كۇش قۇرىلىمدارىنىڭ وكىلدەرى قىزدارعا ارنالعان ورتا مەكتەپكە كەلىپ، اياتوللانى ماداقتايتىن ءاندى ورىنداۋىن تالاپ ەتكەن. وقۋشى قىزدار باس تارتقان سوڭ ولار كۇش قولدانعان. بىرنەشە قىز اۋرۋحاناعا ءتۇسىپ، قالعاندارى قاماۋعا الىندى. 14 قازاندا پاناحي اۋرۋحانادا قايتىس بولدى.

باسىلىم مالىمەتىنشە، يراننىڭ رەسمي تۇلعالارى بولعان وقيعا جاۋاپكەرشىلىگىن موينىمەن كوتەرۋدەن باس تارتقان. اسرا ءپاناحيدىڭ ءولىمى ەلدە نارازىلىق تۋعىزدى. سودان كەيىن مەملەكەتتىك تەلەارنا ەفيرىندە ءوزىن مارقۇمنىڭ نەمەرە اعاسىمىن دەپ تانىستىرعان ءبىر كىسى قىزدى ءتۋابىتتى جۇرەك اقاۋىنان قايتىس بولدى دەپ مالىمدەگەن.

يرانداعى نارازىلىق 22 جاستاعى ستۋدەنت ماحسا ءامينيدىڭ ولىمىنەن كەيىن باستالدى. پوليتسيا ونى كوشەدە حيدجابتى دۇرىس كيمەگەنى ءۇشىن ۇستاعان. تۋىستارىنىڭ ايتۋىنشا، 16 قىركۇيەكتە اميني اۋرۋحانادا اۋىر سوققى سالدارىنان قايتىس بولعان. بيلىك مارقۇمنىڭ جۇرەگىندە اقاۋ بولعان دەيدى. يران ايەلدەرى قارسىلىق رەتىندە شاشىن قىرقىپ، حيدجاب ورتەي باستادى. مىڭداعان ادام كوشەگە شىقتى. ولار اميني ءولىمىن تەرگەۋدى تالاپ ەتتى.

تولقۋلار كۇشپەن باسىلدى. وتكەن اپتادا بيلىك مەكتەپتەردە رەيد وتكىزە باستادى. پوليتسيا قىزمەتكەرلەرىنىڭ سىنىپتارعا باسا-كوكتەي كىرىپ، وقۋشى قىزداردى اۆتوكولىككە كۇشپەن قاماپ، مەكتەپتەردى كوزدەن جاس اعىزاتىن گازبەن اتقىلاپ جۇرگەنىن بەينەجازبالاردان كورۋگە بولادى. يران ۇستازدارىنىڭ كاسىپوداعى بۇل رەيدتەردى "قاتىگەز ءارى ادامگەرشىلىككە جات" دەپ سيپاتتاپ، ءبىلىم ءمينيسترى يۋسەف ءنۇريدىڭ قىزمەتتەن كەتۋىن تالاپ ەتتى.

Iran Human Rights مالىمەتىنشە، 17 قازانداعى مالىمەت بويىنشا ەلدەگى جالپىۇلتتىق نارازىلىقتار كەزىندە 215 ادام، سونىڭ ىشىندە 27 بالا مەرت بولعان.

Abai.kz