قاڭتار وقيعاسى كەزىندە زاڭ بۇزعان قۇقىق قورعاۋ ورگاندارى قىزمەتكەرلەرىنىڭ تەك بىرەۋىنە راقىمشىلىق جاسالادى. بۇل تۋرالى باس پروكۋروردىڭ ورىنباسارى اسەت شىنداليەۆ ايتتى، دەپ حابارلايدى Abai.kz  قازاقپاراتقا سىلتەمە جاساپ. 

ونىڭ ايتۋىنشا، تەرگەۋ ورگاندارى قاڭتار وقيعاسى كەزىندە قىلمىستىق قۇقىق بۇزۋشىلىق جاساعان 1600-دەن استام ادامدى انىقتاپ، ولاردى جاۋاپقا تارتىپ وتىر. ونىڭ ىشىندە راقىمشىلىق 1500-گە جۋىق ازاماتقا جاسالادى.

«وسى ورايدا قۇقىق قورعاۋ ورگاندارىنىڭ 49 قىزمەتكەرى جاۋاپكەرشىلىككە تارتىلىپ وتىر. سونىڭ اراسىندا تەك بىرەۋىنە راقىمشىلىق جاسالۋى مۇمكىن. ول قىلمىستى جاسىرۋ دەرەگى بويىنشا تەرگەلدى. قىزمەتتىك وكىلەتتىگىن اسىرا پايدالانعاندار، ازاپتاۋ جاساعاندارعا راقىمشىلىق جاسالمايدى»، - دەدى ءا. شىنداليەۆ.

سوندىقتان قۇقىق قورعاۋ ورگاندارىنداعى 49 قىزمەتكەردىڭ 48-ىنە راقىمشىلىق بولمايدى.

بۇگىن سەناتتىڭ جالپى وتىرىسىندا «راقىمشىلىق جاساۋ تۋرالى» زاڭ قابىلداندى.

Abai.kz