دۇنيەجۇزىلىك بانك قازاقستاندا حالىقتىڭ 15,5 پايىزى كەدەي تۇرادى دەپ سانايدى. بۇل 19 ملن حالىقتىڭ 2 945 مىڭى كەدەي دەگەن ءسوز.

ەلدەگى رەسمي ستاتيستيكا كەدەي سانىن بۇدان ەكى ەسە از دەپ كورسەتەدى. بىلتىرعى سان بويىنشا 1 ميلليون ادامنان ءسال اسادى.

قانداي ادامدى كەدەي دەيمىز؟ ادەتتە بۇعان ەڭ تومەنگى كۇنكورىس دەڭگەيىندە تابىس تاباتىن ادامداردى جاتقىزادى. قازاقستاندا ەڭ تومەنگى كۇنكورىس دەڭگەيى بيىل قازاندا 48 121 تەڭگە بولدى. اقش دوللارىنىڭ قازىرگى رەسمي باعامىنا شاققاندا 103 دوللار. ءبىر ايعا - 31 كۇنگە بولسەڭىز كۇنىنە 3,3 دوللار.

دۇنيەجۇزىلىك بانك تابىسى ورتاشا ەلدەردەگى كۇنىنە 3,2 دوللار، ال تابىسى ورتادان جوعارى ەلدەردە كۇنىنە 5,5 دوللار تاباتىن ادامداردى كەدەيلىك شەگىندە دەپ باعالاۋدى ۇسىنادى.

وسى جەردە مىنانداي كەرەعارلىق تۋادى بۇۇ-نىڭ ادام دامۋىنىڭ يندەكسى دەيتىن كورسەتكىشىنىڭ 2022 جىلعى رەيتينگىندە قازاقستان ادام دامۋىنىڭ جوعارى دەڭگەيىندەگى ەلدەر قاتارىنا جاتقىزىلىپتى. بۇۇ ءار ەل بويىنشا تەك رەسمي ستاتيستيكاعا سۇيەنەتىنىن ەسكەرۋ كەرەك. ال بىزدە ستاتيستيكانىڭ قالاي سويلەيتىنىن ءبارىمىز جاقسى بىلەمىز.

ەۋروپا ەلدەرىندە كۇندىك تابىسى 5, 5 دوللاردان اسپايتىن ادام كەدەي سانالادى. سانكتسيانىڭ استىندا قالعان، سوعىسىپ جاتقان رەسەيدە ەڭ تومەنگى جالاقى الاتىن كەدەيدىڭ كۇندىك تابىسى 8,5 دوللار. ورىستىڭ كەدەيىنىڭ ءوزى قازاقتىڭ كەدەيىنەن 5 دوللارعا كوپ تابادى.

رەسەيدەگى ينفلياتسيا 13,7 پايىز، بىزدە 17,7 پايىز. ياعني بىزدەگى كەدەيدىڭ كۇندىك 3,3 دوللار تابىسىنىڭ ءبىرازىن ينفلياتسيا جەپ قويۋدا. ال جالپى ەل دامۋى ءۇشىن ونىڭ ازاماتتارى كۇندەلىكتى ءىشىم-جەمنەن بولەك تابىسىنىڭ كەمىندە 10 پايىزىن بىلىمگە، 10-20 پايىزىن دەنساۋلىعىن جاقسارتۋعا جۇمساۋى ءتيىس.

ەلدە ءوندىرىس بولمايىنشا، ازىق-تۇلىكتەن باستاپ حالىق تۇتىناتىن ەڭ قاجەت تاۋاردىڭ كەمىندە 50 پايىزى وزىمىزدە وندىرىلمەيىنشە، جەمقورلىق ىندەتىن توقتاتپايىنشا كەدەيلىك قامىتىن كيگەن وتانداستاردىڭ سانىن ازايتا المايمىز.

دانەش بايبولاتوۆ

Abai.kz