ريددەر قالاسىندا جىلۋ ەلەكتر ستانتسياسىنان تاعى دا اقاۋ شىقتى. مىڭداعان ءۇي جىلۋسىز قالدى. جەرگىلىكتى بيلىك توتەنشە جاعداي جاريالادى.

رەسمي مالىمەتكە سايكەس، 5 قاراشا كەشكى ساعات 20.00-دە كۇل شىعارۋ جۇيەسىنىڭ سورعىسى ىستەن شىقتى. 1 قازاندىق اگرەگاتىنىڭ قوسالقى جابدىعى اپاتتى جاعدايدا توقتاتىلدى.

سونىڭ سالدارىنان جىلۋ جۇيەسىندەگى سۋدىڭ تەمپەراتۋراسى +30 گرادۋسقا دەيىن تومەندەدى. ال قالىپتى تەمپەراتۋرا مولشەرى +70 بولۋى شارت. ريددەر قالاسىندا 22 مىڭنان استام ابونەنتتىڭ ءۇيى سالقىنداپ كەتكەن.

7-11 قاراشا ارالىعىندا مەكتەپ وقۋشىلارى قاشىقتىقتان وقىتۋ فورماتىنا كوشىرىلەدى.

سونداي-اق، وسى ۋاقىتتا قالانىڭ مەكتەپكە دەيىنگى مەكەمەلەرى جۇمىسىن توقتاتادى.

قالادا اپاتتى جويۋ جونىندەگى شۇعىل شتاب قۇرىلدى. وعان وبلىس اكىمى جەتەكشىلىك ەتەدى. جىلۋ ستانتسياسىنا سوگرا جانە وسكەمەن جەو، "وسكەمەن جىلۋ جەلىلەرى" اق ماماندارى بارعان. ولار كۇل شىعارۋ جۇيەسىندە قوزعالتقىشتى اۋىستىرۋ جانە ىسكە قوسۋ-رەتتەۋ جۇمىستارىن باستاپ كەتتى.

جەو-عا قوسىمشا 120 توننا مازۋت جەتكىزىلگەن. ال "قازمىرىش" جشس جەو-عا 20-دان استام قىزمەتكەرىن جىبەرگەن. سونداي-اق، وسكەمەننەن "ۆوستوكۆزرىۆپروم" جشس-ءنىڭ 20 مامانى باردى.

"بىرىككەن ەنەرگوسەرۆيستىك كومپانياسى" كومپانياسى دا ريددەرگە 12 اۆاريالىق بريگاداسىن جىبەردى. جەس-دا جوندەۋ جۇمىستارى ءالى اياقتالعان جوق.

Abai.kz