قازاقستان مۇناي-حيميا ونىمدەرىنىڭ 95 پروتسەنتىنە جۋىعىن يمپورتتاپ وتىر. قاسىم-جومارت توقاەۆ "قازمۇنايگازعا" اتىراۋدا ۇلكەن مۇناي قويماسىن سالۋ ماسەلەسىن قاراستىرۋدى تاپسىردى.

مۇناي قويمالارىن بارىنشا كوبەيتۋ اسا وزەكتى ماسەلە بولىپ تۇر. قازىر قازاقستان دايىن مۇنايدى بىردەن ەكسپورتقا شىعارۋعا ءماجبۇر.

"ويتكەنى، تەحنولوگيا سونداي. ءوندىرىستى توقتاتىپ قويۋعا بولمايدى. وسى ورايدا، قىتايدىڭ جاقسى تاجىريبەسى بار. ولار وتە ۇلكەن قويمالار سالعان. مۇناي بولماي قالعاننىڭ وزىندە ىشكى نارىقتى 3-4 اي بويى قامتاماسىز ەتىپ تۇرا الادى", - دەدى اتىراۋ وبلىسىنا بارعان پرەزيدەنت.

ول اتىراۋدا ۇلكەن مۇناي قويماسىن سالۋ ماسەلەسىندە "قازمۇنايگازعا" ەكولوگيالىق قاۋىپسىزدىك تالاپتارىن ساقتاۋدى تاپسىردى.

"ەنەرگەتيكا مينيسترلىگى مۇناي وندىرەتىن ءىرى كومپانيالارمەن قويمانىڭ قۇرىلىسىنا قاتىستى كەلىسسوز جۇرگىزۋى كەرەك. مۇناي سالاسىنداعى ەڭبەك نارىعىندا شۇعىل شەشۋگە ءتيىس ماسەلەلەر بار. كەلەشەكتە جۇمىسسىزدىقتىڭ پايدا بولۋىنا جول بەرمەۋىمىز كەرەك. ۇكىمەتكە وسى شارۋانى شۇعىل قولعا الۋدى تاپسىرامىن", - دەدى مەملەكەت باسشىسى.

پرەزيدەنتتىڭ ايتۋىنشا، ايماقتىڭ ەكونوميكاسىن ءارتاراپتاندىرۋ قاجەت.

"اتىراۋ وبلىسى مۇناي مەن گازدى تەرەڭ وڭدەيتىن ورتالىققا اينالۋعا ءتيىس. پوليپروپيلەن وندىرەتىن كەشەننىڭ ىسكە قوسىلۋى – وسى باعىتتاعى ماڭىزدى قادام. ايماقتا مۇناي-حيميا كلاستەرىن قۇرۋدىڭ ءبىرىنشى كەزەڭى وسىلاي جۇزەگە اسىرىلىپ جاتىر", - دەدى توقاەۆ.

Abai.kz