تابيعاتتا ءبارى تەپ-تەڭدىكتە ساقتالادى:
- جەر - كۇندى ءوز وربيتاسىمەن اينالادى. ودان اۋىتقىپ كەتسە، جەر بەتىندە تىرشىلىك تە بولماس ەدى...
- اي - مەنىڭ امانحان ءالىم دوسىمنىڭ شابىتى كەلگەن شاقتا شىعادى. ودان اۋىتقىپ كەتسە، ونىڭ دا ءساتتى جىرلارى تۋماس ەدى...
- 250 ميلليون جىل بۇرىن جەر پلانەتاسىندا پانگەيا دەپ اتالاتىن ءبىرتۇتاس قۇرىلىق بولىپتى. ول دا تەپە-تەڭدىكتى ساقتاۋ ءۇشىن ىدىراپ، قازىرگى التى قۇرىلىققا ءبولىنىپ كەتىپتى...
- تىرشىلىكتە ەشنارسە ماڭگىلىك ءومىر سۇرمەيدى. تەپە-تەڭدىك بولۋى ءۇشىن ەسكى مەن جاڭا ۇنەمى الماسىپ وتىرۋى ءتيىس ەكەن.
ادام
ادام ءومىرى تەپە-تەڭدىكتەن قۇرالادى:
- جاس كەزدە ء"تان قۋاتى" تاۋ قوپارارداي بولادى. بىراق قوپارمايدى. سەبەبى، بۇل كەزدە "جان قۋاتى" كەمەلدەنبەگەن.
- جاس ۇلعايعان سوڭ "جان قۋاتى" كەمەلدەنىپ، تاۋ قوپارار كۇيگە كەلەدى. بىراق قوپارمايدى. سەبەبى، بۇل كەزدە وعان توزعان ءتان توسقاۋىل بولادى...
قازاق سول ءۇشىن دە قامالدى قىرىق جاستا الۋ كەرەك دەگەن ءسوزدى ايتادى.
بۇل كەز - ءتان مەن جان قوزعالىسىنىڭ ورىن الماستىراتىن، ياعني تەڭەلەتىن ۋاقىتى بولسا كەرەك...
ەندى ءتان - تومەنگە، جان - جوعارىعا بەت الادى.
ءسويتىپ، كەمەلىنە كەلگەن جان ءتاننىڭ ەمەس، ەلدىڭ قازىناسىنا اينالۋعا بەت بۇرادى.
تەپە-تەڭدىك بولۋى ءۇشىن "توزعان تانگە" سايكەس "كەمەل جان" بولۋى كەرەك ەكەن.
بولماسا، تەڭدىك بۇزىلىپ، جالپى حاوس باستالادى.
قازاق حالقى وسى زاڭدى قاتاڭ ساقتاپ كەلگەن.
ونى بىرەۋ لايلاپ ەدى - حالىق ءوز باعدارىنان، ارىدەن كەلە جاتقان جۇرىسىنەن جاڭىلا جازدادى!
ادامدار "توزبايتىن ءتان بولادى" دەگەنگە سەنىپ قالسا - "جان قۋاتىن" كەرەك قىلمايتىنىن بايقاتتى... ءومىر جالعان بوپ قالدى...
قالپىنا كەلتىرەيىك و باستاعىنى!

ءابدىراشيت باكىرۇلى

Abai.kz