بۇۇ باس اسسامبلەياسى رەسەي ۋكرايناعا كەلتىرگەن شىعىنى ءۇشىن وتەماقى تولەيدى دەگەن شەشىم قابىلدادى.

بۇل شەشىمدى ۇيىمنىڭ 193 مۇشەسىنىڭ 94-ءى رەزوليۋتسيانى قولداعان. قارسى داۋىس بەرگەندەر اراسىندا بەلارۋس، كۋبا، يران، سيريا، زيمبابۆە جانە ت.ب. – بارلىعى 14 ەل بار. قالىس قالعان 73 ەلدىڭ اراسىندا قازاقستان، سەربيا، برازيليا مەن ءۇندىستان تۇر. بۇل بۇۇ باس اسسامبلەياسىنىڭ ۋكرايناداعى سوعىسقا رەسەيدى ايىپتايتىن بەسىنشى رەزوليۋتسياسى.

وسىلايشا بۇۇ باس اسسامبلەياسى "رەسەي ۋكرايناعا سوعىس باستاپ، حالىقارالىق قۇقىقتى بۇزدى جانە ونىڭ قۇقىقتىق سالدارى ءۇشىن جاۋاپ بەرۋگە، كەلتىرىلگەن شىعىندى وتەۋگە ءتيىس" دەپ ەسەپتەدى. رەزوليۋتسيادا سوعىستىڭ ۋكرايناعا كەلتىرگەن زاردابى مەن وتەماقىنى ەسەپتەيتىن ارناۋلى حالىقارالىق مەحانيزم قۇرۋ ماسەلەسى ۇسىنىلعان.

رەسەيدىڭ بىرىككەن ۇلتتار ۇيىمىنداعى تۇراقتى وكىلى باس اسسامبلەيا شەشىمى جونىندە: "وتەماقى دەپ وتىرعان نارسەگە اقشانى قايدان العىسى كەلەتىنىن بىلەمىز. باتىس رەسەيدىڭ بۇعاتتالعان اقشاسىن، شىن مانىندە رەسەيدەن ۇرلاپ العان جۇزدەگەن ميلليارد دوللار اكتيۆتەرىن پايدالانۋ جولىن زاڭداستىرعىسى كەلەدى" دەدى.

دەگەنمەن رەسەي وزىنە قارسى كەز كەلگەن قۇجاتقا بۇۇ قاۋىپسىزدىك كەڭەسىنىڭ تۇراقتى مۇشەسى رەتىندە ۆەتو قويا الادى.

Abai.kz