ەلىمىز بويىنشا BAQYLA قوزعالىسى 5 مىڭنان استام باقىلاۋشىنى جۇيەلى وقىتىپ، ارنايى ۋچاسكەلەرگە جولدادى. 20 قاراشادا وتكەن كەزەكتەن تىس پرەزيدەنت سايلاۋىندا سايلاۋ پروتسەسىن باقىلاۋعا ارالاسىپ، رەسپۋبليكا بويىنشا 27 قالا مەن ەلدى-مەكەندى قامتي الدى.

بۇعان دەيىن ورتالىق سايلاۋ كوميسسياسى قازاقستان بويىنشا 10 مىڭنان استام سايلاۋ ۋچاسكەلەرى بار ەكەنىن مالىمدەدى. ءبىز سونىڭ 3,2 مىڭعا جۋىق ۋچاسكەسىن، ياعني 30 پايىزىن قامتي الدىق دەپ ايتا الامىز.

سايلاۋ پروتسەسى ءبىز كۇتكەندەي تارتىستى وتپەدى. ويتكەنى توقاەۆتان باسقا ۇمىتكەرلەردىڭ تانىمالدىعىنىڭ تومەن بولۋى ءارى ناۋقان بارىسىندا جۇرگىزگەن ۇگىت-ناسيحاتتىڭ وسالدىعى سەبەپ بولدى دەگەن پىكىردەمىز. وعان قوسا، سايلاۋ ناۋقانى ەكى ايعا جۋىق ۋاقىتقا سوزىلعانىنا قاراماستان، سايلاۋشىلار كەيبىر ۇمىتكەرلەردىڭ ەسىمىن جاتتاپ تا ۇلگەرمەدى.

ۇمىتكەرلەر اراسىندا كۇرەس قىزۋ شىقپاعان سوڭ، سايلاۋ كۇنى باقىلاۋ پروتسەسى دە اسا تارتىستى بولمادى. ۇمىتكەرلەرگە قاتىستى داۋىس ساناۋدى بۇرمالاۋدىڭ قاجەتتىلىگىنىڭ جوقتىعىنان دا بولار، وتكەن سايلاۋمەن سالىستىرعاندا زاڭ بۇزۋشىلىق تا ازىراق تىركەلدى.

باقىلاۋشىلاردى سايلاۋ ۋچاسكەلەرىنە كىرگىزبەي، ولارعا حاتتاما بەرمەي، ۋاقىتىنان بۇرىن شىعارىپ جىبەرۋگە تىرىسۋ بويىنشا ونداعان فاكتىلەر تىركەلدى. وسىنداي زاڭ بۇزۋشىلىقتاردىڭ كوبى سايلاۋ ۋچاسكەسىندە شەشىلدى.

ءبىز ازاماتتىق قوعامنىڭ قالىپتاسىپ، بەكي ءتۇسۋ ءۇشىن سايلاۋدى باقىلاۋ ماڭىزدى ءرول اتقارادى دەپ سانايمىز. الداعى كەزەكتەن تىس پارلامەنت سايلاۋى كەزىندە دە بايقاۋشىلار ينستيتۋتىن نىعايتۋعا بارىنشا اتسالىسامىز دەگەن نيەتتەمىز.

دوس كوشىم: «باقىلاۋشىلاردى دايىنداۋ ءۇشىن قاشىقتان وقىتۋ ارقىلى قازاق جانە ورىس تىلدەرىندە بىرنەشە ترەنينگ وتكىزىلدى. وعان BAQYLA قوزعالىسىنا كىرەتىن ۇكىمەتتىك ەمەس قوعامدىق بىرلەستىكتەردىڭ وبلىستىق، قالالىق دەڭگەيدەگى ترەنەرلەرى قاتىستى. قاتىسۋشىلاردىڭ سۇراقتارىنا جاۋاپ بەرىلىپ، ترەنينگتەردىڭ ەلەكتروندى جازباسى بارلىق وڭىرلەرگە تاراتىلدى. ولار ءبىز دايىنداعان «باقىلاۋشى داپتەرى» نەگىزىندە جۇرگىزىلدى.

دينارا ومىرزاقوۆا، پەتروپاۆل قالاسى: «ءبىز BAQYLA-نى حالىق اراسىندا تانىتۋ جۇمىستارىن جۇرگىزدىك، سونىڭ ارقاسىندا قاتارىمىز تولىپ، بەلسەندىلەردى وقىتتىق. باقىلاۋشىلاردىڭ جاسى 19-دان باستالدى، كوبىسى 30-دان اسقان. قالامىزدا 84 سايلاۋ ۋچاسكەسى بار، بارلىعىن قامتىدىق. بۇل ءبىزدىڭ العاشقى تاجىريبەمىز. ءبىز سايلاۋدىڭ ءادىل وتكەنىن قالادىق، سول ءۇشىن بايقاۋشى بولدىق.

باقىتجان بۇقارباي: «بايقاۋشىلار ساياسي تارتىس بولعان جەردە عانا پىسەدى. وكىنىشكە قاراي، بيىلعى سايلاۋ باسەكەلى بولمادى. قالاي بولسا دا، بەلسەندى ازاماتتاردىڭ ىنتاسىن ءوشىرىپ الماۋ كەرەك، سول سەبەپتى بيىلعى بايقاۋشىلىقتىڭ ءبىر ەرەكشەلىگى – ازاماتتىق قوعام مەن سايلاۋدى باقىلاۋ ماڭىزى تۋرالى، سايلاۋ كەزىندە بولاتىن جاعدايلاردى تالداپ بەرەتىن كوپتەگەن دارىستەر وقىلدى».

اسلان زۋلكاشەۆ، اقتوبە قالاسى: «مەن مەكتەپ كەزىنەن بەرى بەلسەندى بولۋعا ۇمتىلدىم. وسكەندە كاسىپ اشتىم، بلوگ جۇرگىزىپ، اۋديتوريامدى كەڭەيتتىم. ساياسي ۇردىسكە ارالاسىپ، سول ارقىلى دا ەلىمىزگە پايدامدى تيگىزگىم كەلدى. اقتوبە حالقى ناۋقانعا بەلسەندى ارالاسادى دەپ كۇتپەدىم. بىراق ادام جيناۋدا ەش قيىندىق كورمەدىك. ارامىزدا تاجىريبەلى باقىلاۋشىلار دا بولدى. جۇمىس بارىسىندا ءبىر-بىرىمىزگە دوس بوپ كەتتىك.

ەرلان ءومىرجانۇلى، سەمەي قالاسى: «بايقاۋشىنىڭ ماقساتى نە؟» دەگەن سۇراقتىڭ جاۋابى – ءادىل سايلاۋدىڭ ءوتۋىن باقىلاۋ. ءبىز وسىنى جاستارعا جەتكىزگىمىز كەلدى، ويتكەنى كوبىسى مۇنىڭ ماڭىزىن بىلە بەرمەيدى، بىلسە دە بەيقام قارايدى».

Abai.kz