سايلاۋ ءوتتى،  ەندى جاڭا قازاقستاندا جارقىرايتىن كۇننىڭ كوزى — شەت ەلدەگى قانداستارعا دا تۇسەتىن شىعار؟!

اۋعانستانداعى قازاقتاردىڭ جان ايقايىن بۇرىننان بەرى ايتىپ تا،  جازىپ تا كەلەمىز.  بىراق دىم وزگەرىس جوق.

اي بۇرىن جازعانىمداي پاكىستانداعى كاراچي قالاسىندا دا ەلگە جەتە الماي،  قينالىپ وتىرعان قازاقتار بار. بارلىعى 43 وتباسى،  300 دەن استام ادام. ناقتىراق ايتسام 18 جاستان تومەن 75 قىز بالا،  87 ەر بالا جانە ەڭبەككە قابىلەتتى ەركەك-ايەل ارالاس 127 ەرەسەك ادام بار. ءبارى قازاق،  كەرەيدىڭ سارباس رۋىنان.  سول اعايىننىڭ ىشىندەگى حاميت باۋىرىم ماعان مۇڭىن ايتىپ اپتا سايىن حابارلاسادى. ەلگە جەتە الماي ءجۇر. «ىستىق-سۋىق دەمەيمىز، جامان-جاقسى دەمەيمىز، سولتۇستىككە ءسىزدىڭ جانىڭىزعا بارىپ،  ءبىر اۋىل بوپ قونىستانۋعا رازىمىز دەيدى. سۋىعىنان قورىقپايمىز، مال اسىراپ، ەگىنشىلىك ەتىپ اياققا تۇرىپ كەتەمىز»،- دەيدى. رۋىن بىلەدى، جەتى اتاسىن ايتىپ تۇر. قازاقشا سويلەيدى. بۇدان ارتىق نە كەرەك؟

قۇداي وڭداپ، وسى قانداستاردى كوشىرىپ جاتسا،  بۇلاردى ءبولىپ-جارماي، ءبىر اۋدانعا ورنالاستىرعان ءجون. نەگىزى،  سولتۇستىكتە ينفروسترۋكتۋراسى تولىق بۇلىنبەگەن،  بىراق جابىلۋ الدىندا تۇرعان اۋىلدار از ەمەس.  ول اۋىلداردا ارزان باعاعا ساتىلىپ تۇرعان، 500-1 000 000 تەڭگە اراسىنداعى يەسى جوق، قورا قوپسىسى بار، تۇرۋعا، مال اسىراۋعا قولايلى ۇيلەر دە جەتەرلىك. وڭتۇستىكتەن سولتۇستىككە ءبىر وتباسىنى كوشىرۋ ءۇشىن ۇكىمەت تاراپىنان 10 ميلليون تەڭگە جۇمسالادى( 8 ميلليون، جاڭادان سالدىرىپ ساتىپ الىنعان ءۇيدىڭ باعاسى جانە ادام سانىنا قاراي بەرىلەتىن كۆوتا). سول اقشاعا «راسچەت» جاساپ، اۋعانستاننان،  پاكىستاننان كەلەتىن وسىنداي وتباسىلارعا بوساپ قالعان اۋىلداردان ۇيلەر الىپ،  ونى كۇردەلى جوندەۋدەن وتكىزىپ، قالعان اقشاعا مال الىپ بەرۋدى،  سول مالدى وسىرەتىن مۇمكىندىكتەر پاكەتىن جاساۋدى ۇسىنامىن.  تەگىن ەمەس،  كرەديت رەتىندە.  سول مالدىڭ ءوسىمىن،  ءونىمىن ساۋدالاۋى ارقىلى  ماناعى اقشانى ۇكىمەتكە بولاشاقتا قايتارىپ بەرەتىن بولسىن.

"TAUEKEL". تەرىسكەي بىزگە امانات.

بۋراقان داقانوۆ

Abai.kz