قازاقستان پرەزيدەنتى قاسىم-جومارت توقاەۆ پەن فرانتسيا پرەزيدەنتى ەمانۋەل ماكرون سوتتالعان مۇحتار ءابلازوۆتىڭ ماسەلەسىن تالقىلاي ما؟ بۇل سۇراققا قازاقستاننىڭ سىرتقى ىستەر ءمينيسترىنىڭ ورىنباسارى رومان ۆاسيلەنكو جاۋاپ بەردى، دەپ جازدى Ulysmedia.kz.

«ءابلازوۆ مىرزا تۋرالى ايتار بولساق، بۇل ماسەلە كوپتەگەن ەلدىڭ قۇقىق قورعاۋ ورگاندارىنىڭ ماسەلەسى. بۇل تاقىرىپ ساياسي دەڭگەيدە تالقىلانبايدى. قازاقستاننىڭ عانا ەمەس، باسقا دا ەلدەردىڭ، ەۋروپا ەلدەرى مەن اقش-تىڭ قۇقىق قورعاۋ ورگاندارى مەن سوتتارى اينالىساتىن ماسەلە. وزدەرىڭىز بىلەتىندەي، ءابلازوۆ مىرزانى قازاقستاننىڭ سوتى 20 جىلعا سوتتاعان. سونىمەن قاتار، ولار لوندوننىڭ جوعارى سوتىنىڭ ۇكىمىمەن بتا بانكىنەن 4 ملرد تەڭگەنى جىمقىرعانى ءۇشىن دە سوتتى بولعان. قازىر بىلۋىمشە، اقش، ۇلىبريتانيا مەن فرانتسيادا دا وعان قاتىستى سوت پروتسەستەرى ءجۇرىپ جاتىر. وعان قوسا، بۇل پروتسەستىڭ ەكىنشى تاراپى بتا بانكى، الماتى اكىمدىگى مەن قر ادىلەت مينيسترلىگى. سول سەبەپتى بۇل ماسەلە قۇقىقتىق دەڭگەيدە»، - دەدى ۆاسيلەنكو ءماجىلىس كۋلۋارىندا.

مۇحتار تىلەۋبەردىنىڭ ورىنباسارى «ساياسي دەڭگەيدە بۇل ماسەلە تالقىلانبايتىنىن قايتالاپ» ايتتى. ال ەكستراداتسيا ماسەلەسى بويىنشا ول بىلاي دەدى.

«قازاقستان مەن فرانتسيا اراسىندا ونى ەكستراداتسيالاۋ تۋرالى كەلىسىم ءالى جاسالعان جوق. بۇل ماسەلە فرانتسۋز تاراپىمەن ارى قاراي تالقىلانادى. بىلۋىمشە، فرانتسيادا ءابلازوۆتىڭ وزىنە قاتىستى سوت پروتسەسى ءجۇرىپ جاتىر»، - دەدى ول.

ايتا كەتسەك، بۇعان دەيىن فرانتسيانىڭ Le Figaro اقپارات كوزى ءابلازوۆتىڭ ماسەلەسى توقاەۆ پەن ماكرون دەڭگەيىندە تالقىلاناتىنى تۋرالى مالىمەت تاراتقان ەدى. اتالعان گازەتتىڭ 28 قاراشاسىندا جاريالانعان ماقالاسىندا بىلاي دەلىنگەن: «فرانتسيا مەن قازاقستان اراسىنداعى قارىم-قاتىناستىڭ نەگىزىندە ەمانۋەل ماكرون مەن قاسىم-جومارت توقاەۆتىڭ ەليسەي سارايىندا سەيسەنبى كۇنى وتەتىن كەزدەسۋىنىڭ ورتالىعىنداعى شيەلەنىسكەن سوت ءىسى جاتىر. ول – فرانتسيادا ساياسي بوسقىن بولعان وليگارح مۇحتار ءابليازوۆتىڭ ءىسى».

Abai.kz