يراندا يسلام درەسس-كودىن قاداعالايتىن پوليتسيانىڭ قىزمەتى جويىلدى. بۇل تۋرالى BBC حابارلادى.

ەلدىڭ باس پروكۋرورى مۇحاممەد دجافار مونتازەري «مورال ساقتاۋشى پوليتسيانىڭ قىزمەتى جويىلدى. ونىڭ سوت جۇيەسىنە ەشقانداي قاتىسى جوق»،-دەدى.  ول بۇعان دەيىن «ايەلدەردى شاشىن كورسەتپەي جۇرۋگە مىندەتتەيتىن زاڭدى پارلامەنت پەن سوت ورگاندارىنىڭ قاراستىرىپ جاتقانىن» ايتقان بولاتىن.

يسلام كونسۋلتاتيۆتىك اسسامبلەياسىنىڭ ديرەكتورلار كەڭەسىنىڭ وكىلى نەزامۋددين مۋساۆي «يرانداعى جاپپاي نارازىلىق ماسەلەسى پارلامەنت پەن ۇكىمەتتىڭ جابىق وتىرىسىندا كوتەرىلدى، شەرۋلەردىڭ كوپشىلىگى ەكونوميكالىق ماسەلەلەرمەن بايلانىستى. سوندىقتان تۇراقتىلىققا جەتۋدىڭ ەڭ دۇرىس جولى – حالىقتىڭ ناقتى تالاپتارىنا نازار اۋدارۋ»،-دەدى جەكسەنبىدە.

بىراق بەلسەندىلەر «بۇل بيلىكتىڭ قىركۇيەك ايىندا 22 جاستاعى ماحسا اميني قايتىس بولعاننان كەيىن باستالعان جاپپاي نارازىلىقتاردى توقتاتۋ تاكتيكاسى بولۋى مۇمكىن» دەپ سانايدى.

ايتا كەتەيىك، قىركۇيەكتە يراندىق 22 جاستاعى ماحسا ءامينيدى ەلدىڭ مورال پوليتسياسى حيدجاپتى دۇرىس كيمەگەنى ءۇشىن تۇتقىنعا العان. كەيىن ونى ۇرىپ-سوعىپ ولتىرەدى. بىراق رەسمي بيلىك قىزدىڭ جۇرەك تالماسىنان قايتىس بولعانىن ايتىپ، سوققى العانىن تەرىسكە شىعاردى. وسى وقيعادان كەيىن يراندا جاپپاي نارازىلىقتار باستالدى. يران بيلىگى نارازىلىقتاردى ىشكى جاۋلار تۇتاندىرىپ وتىرعان تارتىپسىزدىكتەر دەپ اتايدى. قۇقىق قورعاۋشىلاردىڭ دەرەكتەرى بويىنشا، شەرۋشىلەر مەن پوليتسيانىڭ قاقتىعىسى كەزىندە كەمىندە 450 ادام قازا تاپتى، ونىڭ ىشىندە 60-سى بالا، 18 مىڭنان استام ادام قاماۋعا الىندى.

پارسى BBC قىزمەتى جاريالاعان حات-حاباردا يراننىڭ رۋحاني جەتەكشىسى ءالي حامەنەي حيدجاب كيۋ ەرەجەلەرىن دۇرىس قاداعالاماعانى ءۇشىن ءارتۇرلى قۇرىلىمدارعا بىرنەشە سوگىس بەرگەن.

2006 جىلى ايەلدەرگە حيبجاپ كيۋدى مىندەتتەۋ ءۇشىن مورال پوليتسياسى نەمەسە "تاربيەلىك پاترۋل" پايدا بولدى. بۇل پرەزيدەنت ماحمۋد احمادينەجادتىڭ تۇسى بولاتىن. العاشقى كەزدە تەك ەسكەرتۋ جاساپ جۇرەتىن مورال پوليتسياسىنىڭ كەيىن وكىلەتى كەڭەيىپ، كىنالى دەپ تاپقاندارىن تۇتقىنعا الۋ قۇقىعىنا يە بولدى.

Abai.kz