"ازيا اۆتو – بيپەك اۆتو" كومپانيالار توبىنىڭ ىزدەۋدەگى جەتەكشىلەرىنىڭ ءبىرى پراگادا ۇستالدى. بۇل تۋرالى قازاقستان ىشكى ىستەر مينيسترلىگىنىڭ ءباسپاسوز حاتشىسى شۇعىلا تۇرلىبەك حابارلادى.

"قازاقستان ىشكى ىستەر مينيسترلىگىنىڭ ينتەرپول بويىنشا ۇلتتىق ورتالىعىنىڭ سۇراۋى بويىنشا، چەحيا استاناسى پراگادا "ازيا اۆتو – بيپەك اۆتو" كومپانيالار توبى جەتەكشىلەرىنىڭ ءبىرى ۇستالدى. ول شىعىس قازاقستان وبلىسىندا اسا ءىرى كولەمدە الاياقتىق جاسادى دەگەن كۇدىكپەن ىزدەۋدە جۇرگەن", - دەدى شۇعىلا تۇرلىبەك دۇيسەنبىدە وتكەن بريفينگ كەزىندە. ونىڭ ءسوزىن "قازينفورم" اقپارات اگەنتتىگى تاراتقان.

شۇعىلا تۇرلىبەكتىڭ سوزىنشە، كۇدىكتى قاماۋعا الىنعان، ەندى ونى قازاقستانعا ەكستراديتسيالاۋ ماسەلەسى قاراستىرىلىپ جاتىر.

2020 جىلى قازاقستاننىڭ يندۋستريا جانە ينفراقۇرىلىمدىق دامۋ مينيسترلىگى اتالعان كومپانيا توبىمەن كەلىسىمشارتىن ۇزگەن. قازاقستان ۇكىمەتى 10 جىلعا جەڭىلدىكپەن العان 174 ميلليارد تەڭگەنى (قازىرگى باعاممەن 371 ميلليون دوللار) مەملەكەتكە قايتارىپ بەرۋدى تالاپ ەتكەن.

يندۋستريا مينيسترلىگى "كومپانيا اۆتوموبيل قۇراستىرۋ جونىندەگى مىندەتتەمەسىن ورىندامادى" دەپ مالىمدەگەن. "ازيا اۆتو" اكتسيونەرلىك قوعامى قوسىمشا قۇن سالىعىنان جانە كەدەندىك تولەمدەردەن بوساتىلىپ، ۋتيليزاتسيالىق الىمدى قايتارۋ ەسەبىنەن ىنتالاندىرىلعان.

2021 جىلدىڭ تامىزىندا قازاقستان بيلىگى "بيپەك اۆتو — ازيا اۆتو" كومپانيالار توبى ديرەكتورلار كەڭەسىنىڭ توراعاسى اناتولي بالۋشكينگە ىزدەۋ جاريالانعانىن حابارلاعان. قازاقستان سوتى ونى قاماۋعا الۋ جونىندە سىرتتاي سانكتسيا بەرگەن.

بالۋشكين مەن ونىڭ كومانداسى سوت شەشىمىنە قارسى بىرنەشە رەت شاعىم تۇسىرگەن. "ازيا-اۆتو" ەكى مىڭنان استام قىزمەتكەرىن تاراتىپ، كاسىپورىن كەيبىر باعىتتارىن جاپقان. بالۋشكين 2020 جىلى وتكىزگەن ءباسپاسوز كونفەرەنتسياسىندا ء"ۇش زاۋىتقا دا تولىق تەكسەرىس جۇرگىزىپ، كىمنىڭ مەملەكەتتىڭ قانداي اقشاسىن العانىن، قايدا قالاي سالعانىن" كورگىسى كەلەتىنىن ايتقان.

Abai.kz