يندۋستريا جانە ينفراقۇرىلىمدىق دامۋ ءمينيسترى قايىربەك وسكەنباەۆ "ارسەلور ميتتال تەمىرتاۋ" مەتاللۋرگيا كومبيناتىنىڭ كوكس-حيميا وندىرىسىندەگى جۇمىسشىنىڭ قازاسىنا قاتىستى پىكىر ءبىلدىردى.

"قىزمەتكەردىڭ تۋىستارى مەن جاقىندارىنا كوڭىل ايتامىن. بەيبىت كۇندە جۇمىسقا بارىپ، قازا تابۋ دەگەن – قورقىنىشتى تراگەديا. بۇل بۇكىل قازاقستاندىقتاردىڭ نارازىلىعىن تۋدىرىپ وتىر دەپ ويلايمىن.

مەملەكەت باسشىسىنىڭ تاپسىرماسىمەن ۇكىمەت بارلىق باعىتتار بويىنشا ءبىر ەمەس، بىرنەشە كوميسسيا قۇردى. جاقىن ارادا ناتيجە بولادى دەپ ويلايمىن. تەك جەكە قىزمەتكەرلەردىڭ عانا ەمەس، بۇكىل كومپانيانىڭ جاۋاپكەرشىلىگى تۋرالى ماسەلە تۋىنداپ وتىر. "ارسەلورميتتال تەمىرتاۋ" كومپانياسىنىڭ باسشىلارىنا قاتىستى قاتاڭ شەشىم قابىلدانۋدا. كومپانيانىڭ قازاقستاندا جۇمىس ىستەۋ، ىستەمەۋى بەلگىسىز. ءبىز مۇنى قاراستىرىپ جاتىرمىز", - دەدى ول.

ايتا كەتەيىك بۇگىن "ارسەلور ميتتال تەمىرتاۋ" مەتاللۋرگيا كومبيناتىنىڭ كوكس-حيميا وندىرىسىندەگى اپاتتان 1982 جىلى تۋعان جۇمىسشى قازا تاپتى.

Abai.kz