قاراعاندىداعى قالي بايجانوۆ اتىنداعى فيلارمونيا رەسەيلىك ءانشى لاريسا دوليناعا كونتسەرت ساحناسىن بەرۋدەن باس تارتتى. رەسەيدىڭ باسقىنشىلىق سوعىسىن قولدايتىن ءانشىنىڭ كەلۋىنە جەرگىلىكتى حالىق قارسى بولعان.

قالي بايجانوۆ اتىنداعى قاراعاندى كونتسەرتتىك بىرلەستىگىنىڭ باسشىلىعى كونتسەرت جارناماسىندا كورسەتىلگەن ورىن مەن ۇيىمداستىرۋشىلار تۋرالى اقپارتتىڭ جالعان ەكەنىن ايتتى.

«قاراعاندىلىقتارعا ءانشى لاريسا دولينانىڭ كونتسەرتى تۋرالى تۋىنداعان سۇراقتارى بويىنشا بايجانوۆ اتىنداعى كونتسەرتتىك بىرلەستىك باسشىلىعىنىڭ بۇل ءارتىستىڭ شاقىرۋىنا قاتىسى جوق ەكەنىن تۇسىندىرەمىز. مۇنداي ءىس-شارالاردى كوممەرتسيالىق قۇرىلىمدار ۇيىمداستىرادى. قازىرگى ۋاقىتتا بايجانوۆ اتىنداعى كونتسەرتتىك بىرلەستىك پەن ۇيىمداستىرۋشىلار اراسىندا تسيرك عيماراتىندا وسى ءارتىستىڭ كونتسەرتىن وتكىزۋ تۋرالى تاراپتاردىڭ كەلىسىمىن راستايتىن زاڭدى قۇجات جوق.
جارنامادا وسى ءىس-شارانى وتكىزۋ جانە ۇيىمداستىرۋشىلار تۋرالى جالعان اقپارات بار. سونىمەن قاتار، قاراعاندى وبلىسى تۇرعىندارىنىڭ نەگاتيۆ پىكىرىنە بايلانىستى، ل.دولينانىڭ كونتسەرتىن وتكىزۋ ءۇشىن ساحنا الاڭىن بەرۋگە جاسالاتىن كەلىسىمشارتقا قول قويىلمايدى»، - دەلىنگەن حابارلامادا.

رەسەي ءانشىسىنىڭ كونتسەرتى 12 اقپاندا قاراعاندى تسيركىندە ءوتۋى ءتيىس بولعان.

Abai.kz