اۋىل اۋماقتارىن دامىتۋدىڭ 5 جىلعا ارنالعان تۇجىرىمداماسى ازىرلەنۋدە. بۇل تۋرالى قر ۇكىمەتىنىڭ كەڭەيتىلگەن وتىرىسىندا پرەمەر-مينيستر ءاليحان سمايىلوۆ ايتتى.

«2029 جىلعا دەيىن 111 ملن شارشى مەتر تۇرعىن ءۇيدى پايدالانۋعا بەرۋ جوسپارلانۋدا. 1 ملن-نان استام وتباسى جاڭا تۇرعىن ۇيمەن قامتاماسىز ەتىلەتىن بولادى. وسى جىلى 15 ملن. شارشى مەتردەن استام، نەمەسە 138 مىڭ تۇرعىن ءۇي سالىنۋدا. اپاتتى جانە توزىعى جەتكەن ۇيلەر بويىنشا قايتا جاڭارتۋ باعدارلامالارىن ىسكە اسىرۋ جۇمىستارى كەڭەيتىلەدى»، - دەدى ۇكىمەت باسشىسى.

ونىڭ اتاپ وتۋىنشە، جەرگىلىكتى ءوزىن-ءوزى باسقارۋ جۇيەسىن دامىتۋ ءۇشىن ءتيىستى زاڭ جوباسى ازىرلەندى. اۋداندار مەن وبلىستىق ماڭىزى بار قالالار اكىمدەرىن تىكەلەي سايلاۋدى ەنگىزۋ بويىنشا زاڭنامالىق اكتىلەرگە تۇزەتۋلەر قابىلداندى. اگلومەراتسيالاردى دامىتۋ تۋرالى زاڭ جوباسى قازىر سەناتتىڭ قاراۋىندا. جاڭا اكىمشىلىك رەفورما اياسىندا مەملەكەتتىك باسقارۋ دەڭگەيلەرى اراسىنداعى وكىلەتتىكتەردى ورتالىقسىزداندىرۋ بويىنشا ءتيىستى جول كارتاسى ازىرلەندى. اكىمشىلىك رەفورما ماسەلەلەرى جونىندەگى زاڭ جوبالارى پارلامەنت ماجىلىسىنە ناۋرىز ايىندا ەنگىزىلەتىن بولادى.

«بيىل 128 ملرد تەڭگە سوماسىنا 576 اۋىلدىق ەلدى مەكەننىڭ ينفراقۇرىلىمىن جاڭعىرتۋعا باعىتتالعان «اۋىل – ەل بەسىگى» جوباسىن ىسكە اسىرۋ جالعاسۋدا. كەلەسى جىلى 663 اۋىلدىق ەلدى مەكەندە 140 ملرد تەڭگە سوماسىنا 1,6 مىڭ جوبانى ىسكە اسىرۋ جوسپارلانعان. اۋىل اۋماقتارىن دامىتۋدىڭ 5 جىلعا ارنالعان تۇجىرىمداماسى ازىرلەنۋدە»، - دەدى ءاليحان سمايىلوۆ.

Abai.kz