مەملەكەت باسشىسى قاسىم-جومارت توقاەۆ «ارسەلورميتتال تەمىرتاۋ» كومپانياسى ەڭبەك، ەكولوگيا جانە سالىق زاڭدارىن بۇزىپ، ينۆەستيتسيالىق مىندەتتەمەلەردى ورىنداماي وتىرعانىن ايتتى، دەپ جازادى Ulysmedia.kz.

جىل باسىنان بەرى ءوندىرىس ورنىندا 1 124 جۇمىسشى جاراقات الىپ، ونىڭ 157-ءسى قايتىس بولدى. جەكەلەگەن كاسىپورىنداردا ادام شىعىنىمەن بولاتىن جازاتايىم وقيعالار جۇيەلى سيپات الدى. بۇل ماسەلە «ارسەلورميتتال تەمىرتاۋ» كومپانياسىنا دا قاتىستى. 2006 جىلدان بەرى كاسىپورىندا 20-دان اسا جازاتايىم وقيعا بولىپ، 100-دەن اسا ازاماتىمىز قازا تاپتى. بيىلدىڭ وزىندە 14 ادام قايتىس بولدى. ونىڭ ىشىندە 1 جۇمىسشى وتكەن اپتادا مەرت بولدى. مەملەكەتتىك ورگاندار مەن قوعامدىق ۇيىمداردىڭ حابارلامالارىنا سايكەس، كومپانيا ەڭبەك، ەكولوگيا جانە سالىق زاڭدارىن بۇزىپ، ينۆەستيتسيالىق مىندەتتەمەلەردى ورىندامايدى. وسىعان بايلانىستى حالىق ءادىل ءارى شۇعىل شارالار كۇتىپ وتىر، – دەدى پرەزيدەنت ۇكىمەتتىڭ كەڭەيتىلگەن وتىرىسىندا.

سونداي-اق قاسىم-جومارت توقاەۆ پرەمەر-مينيسترگە ماسەلەنى باقىلاۋعا الۋدى تاپسىردى.

ايتا كەتەيىك، 8 جەلتوقساندا «ارسەلورميتتال تەمىرتاۋ» اق مەتاللۋرگيالىق زاۋىتىنىڭ كوكسحيميالىق وندىرىسىندە اپات بولىپ، ءبىز ادام قازا بولدى.

ودان بۇرىن قاراشا ايىندا «ارسەلورميتتال تەمىرتاۋ» اق لەنين اتىنداعى شاحتاسىندا گاز جارىلۋى سالدارىنان 5 جۇمىسشى كوز جۇمدى.

بۇدان بۇرىن پرەزيدەنت توقاەۆ اپاتتىڭ ءمان-جايىن انىقتاپ، توتەنشە جاعدايعا شىنايى باعا بەرۋ ءۇشىن حالىقارالىق كومپانيانى تارتۋ كەرەگىن ايتقان. سونداي-اق، كاسىپورىنعا كەشەندى تەكسەرۋ جۇرگىزىپ، ەڭبەك قاۋىپسىزدىگى مەن بارلىق ەكولوگيالىق نورما تالاپتارىنىڭ  ساقتالۋىنا ءمان بەرۋدى تاپسىردى.

پرەزيدەنتتىڭ تاپسىرماسىنان كەيىن  سەناتورلار ەڭبەك قاۋىپسىزدىگى تالاپتارىن قاتايتاتىن زاڭ جوباسىن ازىرلەدى.

سونداي-اق، توتەنشە جاعدايلار ءمينيسترى يۋري يلين قۇقىق قورعاۋ ورگاندارى "ارسەلورميتتال تەمىرتاۋ" (امت) كومپانياسىنىڭ نەگىزگى ينۆەستورى لاكشمي ميتتالدى كىناسى انىقتالعان جاعدايدا جاۋاپكەرشىلىككە تارتۋعا قۇقىلى ەكەنىن مالىمدەدى.

Abai.kz