بۇگىن ۇكىمەت وتىرىسىندا قر پرەمەر-ءمينيسترى ءاليحان سمايىلوۆ ءوز سالاسى بويىنشا جۇمىسىن تولىق اتقارا المايتىن مينيسترلەر وتستاۆكاعا كەتۋى كەرەك ەكەنىن ايتتى.

«بيىل ءبىز كۇردەلى گەوساياسي جاعدايعا بايلانىستى بىرقاتار قيىندىققا تاپ بولدىق. بۇل باعانىڭ وسۋىنە، ينفلياتسياعا، ەكونوميكالىق دامۋدىڭ باسەڭدەۋىنە اكەلىپ سوقتى. 2023 جىلى ءبىزدى جاڭا سىن-قاتەرلەر مەن تاۋەكەلدەر كۇتىپ تۇر. سوندىقتان، ءبىز پرەزيدەنتتىڭ سايلاۋالدى باعدارلاماسى مەن تاپسىرمالارىن ساپالى ىسكە اسىرۋ ءۇشىن بارىنشا كۇش سالۋىمىز كەرەك. سونداي-اق، ءبىز فورس-ماجور جاعدايلارعا بارىنشا تەز ارەكەت ەتۋىمىز قاجەت»، - دەدى ۇكىمەت باسشىسى.

ءاليحان سمايىلوۆتىڭ اتاپ وتۋىنشە، ءار مينيستر ءوز سالاسى بويىنشا تاپسىرمالاردىڭ 100 پايىز ورىندالۋىنا كەپىلدىك بەرۋى ءتيىس. ال، ءاربىر اكىم جەرگىلىكتى جەرلەردە الەۋمەتتىك-ەكونوميكالىق ماسەلەلەردىڭ ساپالى شەشىلۋىن قامتاماسىز ەتۋى كەرەك.

«ءبىزدىڭ جۇمىسىمىزدىڭ ناتيجەسىن قازاقستاندىقتار سەزىنۋى كەرەك. تالاپ وتە جوعارى. ال «قولىمنان كەلمەيدى، شەشىم قابىلداي المايمىن» دەگەن ارىپتەستەرىمىز قازىردەن ورنىن بوساتسىن. ورىندارىڭىزعا باسقا ادامدار كەلەدى. حالىققا شىن جانى اشيتىن، موينىنا جاۋاپكەرشىلىك الىپ، باتىل شەشىم قابىلدايتىن ادامدارمەن عانا جۇمىستى جالعاستىرامىز. سوندا كوزدەگەن ماقساتقا جەتۋگە بولادى»، - دەدى ءاليحان سمايىلوۆ.

Abai.kz