جىل باسىنان بەرى ەلىمىزگە 3 ملن-عا جۋىق رەسەي ازاماتى كەلدى، ونىڭ ىشىندە 837 مىڭ ادام موبيليزاتسيا جاريالانعاننان كەيىن كەلگەن. بۇل تۋرالى كوشى-قون كوميتەتى توراعاسىنىڭ مىندەتىن اتقارۋشى ءىلياس ىسپانوۆ ايتتى.

«ءىس جۇزىندە جىل باسىنان بەرى ءۇش ميلليونعا جۋىق رەسەيلىك قازاقستانعا ءارتۇرلى جاعدايلارعا بايلانىستى كەلىپ، قايتا كەتكەن. 21 قىركۇيەكتە رەسەيدە ءىشىنارا موبيليزاتسيا جاريالانعان سوڭ ەلىمىزگە 837 مىڭ رەسەيلىك كەلىپ، 780 مىڭ ادام قايتا كەتتى»، -دەدى ىسپانوۆ.

ونىڭ سوزىنشە، قازىرگى ۋاقىتتا قازاقستاندا شامامەن 298 مىڭ رەسەي ازاماتى ءجۇر، ونىڭ 30 مىڭى كەلىسىمشارت بويىنشا جۇمىس ىستەيدى. ولار ەلەكتروندى ەڭبەك بيرجاسىندا جانە ۋاقىتشا تۇرعىلىقتى جەرى بويىنشا تىركەلگەن. سونداي-اق، قازاقستاندا رەسەي فەدەراتسياسىنان كەلگەن 20 مىڭعا جۋىق ستۋدەنت ءبىلىم الادى.

«بىزگە كەلىپ، ترانزيتپەن باسقا ەلگە ۇشاتىن ادامدار دا بار. مىسالى، 21 قىركۇيەكتەن باستاپ 198 مىڭ رەسەيلىك ءبىزدىڭ ەلىمىز ارقىلى وزگە ەلگە ۇشقان. ءىس جۇزىندە جىل سايىن قازاقستاندا شامامەن 250-240 مىڭ رەسەيلىك تۇرىپ جاتادى»،-دەدى ءىلياس ىسپانوۆ.

ەسكە سالا كەتەيىك، 29 قاراشادا ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا بيىل قازاقستانعا 400 مىڭنان استام رەسەي ازاماتى كەلىپ، ونىڭ 100 مىڭعا جۋىعى ەلدە جۇرگەنىن ايتقان بولاتىن.

Abai.kz