رەسەي قورعانىس مينيسترلىگى بەلارۋس اۋماعىندا باتالونداردىڭ تاكتيكالىق وقۋلارى ءجۇرىپ جاتقانىن جاريالادى. اسكەري جاتتىعۋلاردىڭ قاشان باستالىپ، قاشان اياقتالاتىنى ايتىلمادى.

"بەيىمدەۋ كەزەڭى اياقتالعان سوڭ" قولباسشىلىق "اسكەري بولىمدەردىڭ ۇرىسقا قانشالىقتى دايىن ەكەنىنە باعا بەرەدى", دەپ "ينتەرفاكس" اگەنتتىگى رەسەي قورعانىس مينيسترلىگىنە سىلتەمە جاساي وتىرىپ حابارلادى.

رەسەي جاۋىنگەرلەرىنىڭ العاشقى توبى بەلارۋسقا قازان ايىندا كەلگەن. ونىڭ الدىندا بەلارۋس قورعانىس مينيسترلىگى "اسكەردىڭ بىرلەسكەن توبىنىڭ وقۋلارىنا" قاتىسۋ ءۇشىن ەلگە توعىز مىڭعا جۋىق رەسەيلىك جاۋىنگەر، جۇزدەن اسا تانك، بروندى كولىكتەر مەن مينومەتتار، سونىمەن بىرگە اۆياتسيا كەلەتىنىن حابارلاعان.

سودان بىرنەشە كۇن بۇرىن بەلارۋس باسشىسى الەكساندر لۋكاشەنكو بەلارۋسقا شابۋىلداۋعا دايىندالىپ جاتىر دەپ ۋكراينانى تاعى ءبىر مارتە ايىپتاپ، مۇنداي بىرلەسكەن توپتىق قاجەتتىلىگىن "وداقتاس مەملەكەتتەردىڭ باتىستاعى شەكاراسىنداعى جاعداي شيەلەنىسىپ بارا جاتقانىمەن" تۇسىندىرگەن. ۋكراينا كورشى بەلارۋسقا شابۋىلداۋعا دايىندالىپ جاتىر دەگەندى جوققا شىعارعان.

جەلتوقساننىڭ باسىندا لۋكاشەنكو رەسەي قورعانىس ءمينيسترى سەرگەي شويگۋمەن كەزدەسۋدە رەسەي مەن بەلارۋس اسكەرى ء"بىر توپ، ءبىر ارميا رەتىندە" دايىندىقتان وتۋگە جارايدى دەپ مالىمدەگەن. 13 جەلتوقساندا بەلارۋستا لۋكاشەنكو جارلىعىمەن كۇتپەگەن جەردەن ەلدىڭ قارۋلى كۇشتەرىنىڭ ۇرىسقا دايىندىعى تەكسەرىلە باستادى.

بەلارۋس ارمياسى ۋكرايناعا قارسى سوعىسقا تىكەلەي قاتىسقان جوق، الايدا رەسەي اسكەرى 2022 جىلعى اقپان-ناۋرىز ايلارىندا كيەۆكە سول جاقتان شابۋىلداعان. بۇعان قوسا، رەسەي بەلارۋس اۋماعىن ۋكراينانى اۋەدەن سوققىلاۋ ماقساتىندا پايدالانىپ وتىر. سوعان بايلانىستى باتىس ەلدەرى بەلارۋسقا قارسى سانكتسيالار ەنگىزدى.

ۋكراينا بارلاۋ قىزمەتىنىڭ دەرەگىنشە، بەلارۋس اۋماعىنا رەسەي ساربازدارى مەن اسكەري تەحنيكاسى ءوتىپ جاتىر، بىراق كيەۆ بەلارۋس جاعىنان شابۋىل بولادى دەپ ەسەپتەمەيدى. ۋكراينا اسكەرى بەلارۋسپەن شەكاراداعى جولداردى مينالاپ، شەكاراداعى وزەندەردەگى كوپىرلەردى جارىپ تاستادى.

Abai.kz