قر پرەمەر-ءمينيسترىنىڭ ورىنباسارى رومان سكلياردىڭ «كازاحستان سوبرال رەكوردنىي ۋروجاي» اقپاراتى جايلى ەكى اۋىز ءسوز ارنايىق...

18 جەلتوقساندا قر پرەمەر-ءمينيسترىنىڭ ورىنباسارى رومان سكلياردىڭ: «كازاحستان سوبرال رەكوردنىي ۋروجاي»، - دەپ اتالعان ماقالاسى جاريالاندى. اۆتور ۇستىمىزدەگى جىلى 23 ملن ءداندى جانە ءداندى-داقىلدار جينالعانىن (وكىنىشكە وراي توننا نەمەسە گەكتار ەكەنى كورسەتىلمەپتى), وتكەن جىلمەن سالىستىرعاندا بۇل كورسەتكىش 27 پايىزعا جوعارى، نەگىزگى ازىقتىق داقىل-بيدايدىڭ تۇسىمدىلىگى 30 پايىزعا ارتقانىن جازىپتى.

جاريالانعان رەسمي دەرەكتەرگە جۇگىنسەك، 27 قىركۇيەكتە ءداندى-داقىلداردىڭ 15,4 ملن گا ەگىسى، نەمەسە 96,2 پايىزى ورىلىپ، 20,1 ملن توننا استىق جينالىپ، 1 گەكتارعا شاققاندا ورتاشا تۇسىمدىلىك 13,0 تسەنتنەر بولىپتى.

بۇل سونشاما ماقتاناتىنداي كورسەتكىش ەمەس. ديحانداردىڭ ەڭبەگى ەش كەتىپ، ەكسپورتقا شىعارۋعا تەمىرجول ۆاگوندارى بولماي، قىرماندار مەن دالادا جينالعان ءونىمنىڭ قانشاسى شىرىگەنى جايلى جوعارعى مارتەبەلى شەنەۋنىك اقپارات بەرمەپتى. ۇستىمىزدەگى جىلدىڭ 8 ايىندا دۇنيەجۇزىنىڭ 63 ەلىنە ەكسپورتتالعان اۋىلشارۋاشىلىق ونىمدەرىنىڭ قۇنى 3,3 ملرد دوللاردى قۇراپتى، وتكەن جىلمەن سالىستىرعاندا كورسەتكىش 44 پايىز جوعارى ەكەن.

سكليار مىرزا!

ەلىمىز ازىق-تۇلىك وندىرۋدەن وسىنداي وراسان زور تابىستارعا جەتىپ جاتسا، نە سەبەپتەن ولاردىڭ قۇنى 20-30%، تىپتەن، كەيبىر ونىمدەر 50 پايىزعا دەيىن كوتەرىلىپ، قاراپايىم حالىقتىڭ جاعدايى مۇشكىلدەنە ءتۇستى؟ باتىس ەۋروپادا ونىڭ نەگىزگى سەبەبى - ەنەرگەتيكالىق رەسۋرستاردىڭ، جانار جانە جاعارمايدىڭ، گازدىڭ قىمباتتاۋى بولىپ وتىر، ولاردى ءبىز ءوزىمىز شىعارامىز.

پرەمەر-ءمينيستردىڭ ورىنباسارى ۇكىمەت اگرارلىق عىلىم سالاسىن دا جارىلقاپ جاتقانىن، وعان سوڭعى جىلدارى 8-9 ملرد قاراجى ءبولىنىپ وتىرعانىنا توقتالىپتى. الەۋمەتتىك جەلىدە جاقىندا جاريالانعان جۇماباي ءدىلماسوۆتىڭ دەرەكتەرىنە قاراعاندا، 2021-2022 جج. عىلىم مەن كونسترۋكتورلىق جۇمىستاردى قارجىلاندىرۋعا 109,3 ملرد ۇلتتىق ۆاليۋتا بولىنگەن ەكەن، دەمەك جالپى ىشكى ءونىمنىڭ 0,13 پايىزىنا تەڭ. دامىعان مەملەكەتتەردە بۇل كورسەتكىش 3-4% جەتەدى، رەسەي مەن تۇركيادا 1 پايىزعا جۋىق. عىلىمي قىزمەتكەرلەردىڭ ورتاشا جالاقىسى ەلىمىز بويىنشاعى كورسەتكىشتەن 25 پايىزعا تومەن. وسىنىڭ سالدارىنان 2021 جىلى عىلىمي قىزمەتكەرلەردىڭ سانى 16 پايىزعا تومەندەگەن، ولاردىڭ كوپشىلىگى جاستار ەكەنى تۇسىنىكتى.

مۇرات قويشىباەۆ

Abai.kz