وزبەكستان پرەزيدەنتى ءباسپاسوز قىزمەتىنىڭ حابارلاۋىنشا، جوعارى دەڭگەيدەگى كەلىسسوزدەردە كورشى ەلدەردىڭ جانە ايماقتىڭ ماڭىزدى ماسەلەلەرى تالقىلانادى دەپ جوسپارلانعان.

"سامميتتە وزبەك-قازاق ستراتەگيالىق ارىپتەستىگى مەن وداقتاستىعى قارىم-قاتىناسىن ءارى دامىتۋ، ساۋدا كولەمىن ارتتىرۋ، ءوزارا ءتيىمدى جوبالاردى قولعا الۋ، اۋىل شارۋاشىلىعى، كولىك جانە لوگيستيكا سالالارىنداعى ارىپتەستىكتى كەڭەيتۋ، ايماقارالىق جانە مادەني-گۋمانيتارلىق بايلانىستى جالعاستىرۋ ماسەلەلەرى ءسوز بولادى", - دەپ حابارلادى پرەزيدەنتتىڭ ءباسپاسوز قىزمەتى.

مەملەكەت باسشىلارى بىرنەشە ءىرى بىرلەسكەن ينۆەستيتسيالىق جوبانى ىسكە قوسادى.

توقاەۆتىڭ تاشكەنتكە ساپارىندا رەسەي، قازاقستان جانە وزبەكستان اراسىندا "گاز وداعىن" قۇرۋ ماسەلەسى تالقىلانار-تالقىلانباسى تۋرالى مالىمەت جاريالانبادى.

ۆلاديمير پۋتين قاسىم-جومارت توقاەۆتىڭ قاراشانىڭ اياعىندا ماسكەۋگە ساپارى كەزىندە رەسەي، قازاقستان جانە وزبەكستان اراسىندا "ۇشجاقتى گاز وداعىن" قۇرۋ تۋرالى ۇسىنىس ايتقان.

وتكەن اپتادا قازاقستاننىڭ ەنەرگەتيكا ءمينيسترى بولات اقشولاقوۆ مەملەكەت رەسەي مەن دە، وزبەكستانمەن دە گاز ماسەلەسى بويىنشا تىعىز قارىم-قاتىناس ورناتقانىن، "گاز وداعىن" قۇرۋ ماسەلەسى تالقىلانباعانىن مالىمدەدى.

وزبەكستان ەنەرگەتيكا ءمينيسترى جۋرابەك ءميرزاماحمۋدوۆتىڭ 7 جەلتوقساندا جۋرناليستەرگە مالىمدەۋىنشە، تاشكەنت "گازدى ەشقاشان ساياسي شارتپەن الماستىرمايدى". ءمينيستردىڭ ايتۋىنشا، رەسەيدەن گاز الۋ تۋرالى شارتقا وتىرۋ اليانس قۇرۋ دەگەندى بىلدىرمەيدى.

Abai.kz