"قاڭتار وقيعاسى كەزىندە ادامداردىڭ قالاي قايتىس بولعانىن 95 پايىزعا بىلەمىز". بۇل تۋرالى باس پروكۋروردىڭ ءبىرىنشى ورىنباسارى تيمۋر تاشىمباەۆ ايتتى.

«238 ادام قازا تاپتى، ونىڭ 19-ى قۇقىق قورعاۋ ورگاندارىنىڭ قىزمەتكەرلەرى مەن اسكەري قىزمەتشىلەر. ەگەر ادامداردىڭ قانداي جاعدايدا قايتىس بولعانىن سۇراساڭىز، ونىڭ 95 پايىزى بەلگىلى. ءبىز مۇنى بۇرىن دا ايتقان ەدىك»،-دەدى ول.

ارنايى پروكۋرورلار قىزمەتىنىڭ باستىعى ريزابەك وجاروۆتىڭ ايتۋىنشا، 92 ادامنىڭ توتەنشە جاعداي جاريالانعان كەزدە جاپپاي تارتىپسىزدىكتەر ورىن العان ايماقتا بولعانى انىقتالعان. «بۇل قيىن جۇمىس. قوعام تەرگەۋ جۇمىستارىنىڭ كوپكە سوزىلىپ كەتكەنىن ايتادى. ءبىز ءاربىر مارقۇمنىڭ نەدەن جانە قايدا قايتىس بولعانىن انىقتاپ جاتىرمىز»،-دەدى وجاروۆ.

پروكۋراتۋرانىڭ مالىمەتىنشە، بۇگىندە 1249 ادام جازاعا تارتىلعان. 160 ادام باس بوستاندىعىنان ايىرىلدى. قالعاندارىنا جەڭىلىرەك جازا تاعايىندالدى.

"بيلىگىن اسىرا پايدالاندى دەپ ايىپ تاعىلعان بۇرىنعى قورعانىس ءمينيسترى بەكتانوۆتىڭ ءىسى سوتتا قارالىپ جاتىر. الماتى قالاسى، الماتى جانە قىزىلوردا وبلىستارى ۇلتتىق قاۋىپسىزدىك جانە پوليتسيا دەپارتامەنتتەرىنىڭ بۇرىنعى باسشىلارىنا قاتىستى تەرگەۋ اياقتالدى", - دەدى تاشىمباەۆ.

الماتى جانە تالدىقورعان قالالارىندا ۇقك مەن ءىىم-ءنىڭ 29 قىزمەتكەرىنە قاتىستى ازاپتاۋ بويىنشا قىلمىستىق ىستەر اياقتالدى. ونىڭ 17-ءسى سوتقا جولداندى.

Abai.kz