قارجىلىق مونيتورينگ اگەنتتىگى «ازياگازچۋندجا» جشس قۇرىلتايشىلارى قايرات بورانباەۆ پەن رومان ناحانوۆقا جانە «Qazaq Gaz» اق باسقارما توراعاسىنىڭ بۇرىنعى ورىنباسارى تاير جانۇزاققا سۇيىتىلعان مۇناي گازىن ساتىپ الۋ كەزىندە 14,5 ملرد تەڭگە ۇرلاۋ جانە قىلمىستىق كىرىستەردى زاڭداستىرۋ فاكتىلەرى بويىنشا قىلمىستىق ءىستى تەرگەۋدى اياقتادى، دەپ جازدى halyq-uni.

23 جەلتوقساندا باس پروكۋراتۋرا ءىستى سوتتىڭ قاراۋىنا جىبەردى.

ۇلتتىق كومپانياعا كەلتىرىلگەن زالال «Qazaq Gaz» اق شوتتارىنا اۋدارۋ ارقىلى تولىق كولەمدە وتەلدى. ايىپتالۋشىلاردىڭ 38 ملرد تەڭگە سوماسىنداعى اقشالاي قاراجاتىنا، 15 جىلجىمايتىن مۇلىك وبەكتىسىنە، 3 اۆتوكولىك قۇرالىنا تىيىم سالىندى.

اگەنتتىك قايرات بورانباەۆقا جانە باسقا ادامدارعا قاتىستى گاز ەكسپورتى كەزىندە ۇرلاۋ جانە قىلمىستىق جولمەن الىنعان مۇلىكتى زاڭداستىرۋ فاكتىلەرى بويىنشا بولىنگەن ىستەر شەڭبەرىندە سوتقا دەيىنگى تەرگەۋدى جالعاستىرۋدا.

قىلمىستىق-پروتسەستىك كودەكستىڭ 201-بابىنا سايكەس وزگە اقپارات جاريا ەتىلمەيدى.

ايتا كەتەيىك، 2022 جىلدىڭ ناۋرىزىندا كۆازيمەملەكەتتىك سەكتوردا اسا ءىرى كولەمدە قارجى جىمقىرۋ دەرەگى بويىنشا قىلمىستىق ءىس بويىنشا قايرات بورانباەۆ قاماۋعا الىندى.

2022 جىلدىڭ قىركۇيەگىندە قارجى مونيتورينگى اگەنتتىگى اسا ءىرى كولەمدە مەملەكەت قارجىسىن جىمقىردى جانە اقشانى جىلىستاتتى دەگەن كۇدىككە ىلىنگەن قايرات بورانباەۆ پەن ونىڭ سىبايلاستارىنا قاتىستى ءىستىڭ تەرگەۋىن اياقتادى.

قارجى مونيتورينگى اگەنتتىگىنىڭ حابارلاۋىنشا، ۇرلانعان 14,5 ملرد تەڭگە كولەمىندەگى قاراجات كەيىننەن زاڭدى كاسىپكەرلىك قىزمەتتەن ديۆيدەند رەتىندە ءبولۋ جانە تولەۋ جەلەۋىمەن زاڭداستىرىلعان. وسىلايشا، كۇدىكتىلەر جاسالعان زاڭسىز وپەراتسيالاردىڭ شىن ءمانىن جاسىرعان. تەرگەۋ بارىسىندا كەلتىرىلگەن شىعىن تولىق كولەمدە وتەلدى. سونىمەن قاتار 38 ميلليارد تەڭگە قولما-قول اقشا مەن 4,2 ميلليارد تەڭگەنىڭ جىلجىمايتىن مۇلىكتەرى تاركىلەندى. وسى ءبولىم بويىنشا تەرگەۋ اياقتالدى، ماتەريالدار پروتسەسكە قاتىسۋشىلارعا تانىستىرۋ ءۇشىن بەرىلدى.

قايرات بورانباەۆ – داريعا نازارباەۆانىڭ قۇداسى. بورانباەۆتىڭ قىزى ءاليما 2013 جىلى ايسۇلتان نازارباەۆقا تۇرمىسقا شىقتى. ايسۇلتان 2020 جىلى تامىزدا لوندوندا قايتىس بولدى.

Abai.kz