ەگەر ءبارى ويداعىداي بولسا (ادام شىعىنى ازايسا) 2023 جىلدىڭ اياعىنا تامان قازاقستان حالقىنىڭ سانى 20 ميلليوندىق مەجەنى باعىندىرادى. بۇل كەرەي مەن جانىبەك سۇلتاندار بولەك تۋ تىككەن ۋاقىتتان بەرگى ابسوليۋتتى رەكورد. بيىل رۋمىنيانى باسىپ وزۋعا بارلىق مۇمكىندىك بار. دەموگرافيالىق ناقتى ترەند: ەۋروپالىقتار ازىراق ولەدى. بىراق ءبىز ولاردان كوبىرەك تۋامىز.

20 ميلليونعا جەتۋدىڭ 2 باعىتى بار: ينسۋلت پەن ينفاركتپەن اياۋسىز كۇرەس جانە ادامداردىڭ تۋعا دەگەن قىزىعۋشىلىعىن كۇشەيتۋ. جىل سايىن 44 مىڭ قازاقستاندىق ينسۋلت پەن ينفاركتتان قايتىس بولادى. ءبىر قىزىعى، پالما مايىن تۇتىنۋ (فاستفۋد، تب) وسكەن سايىن، وسى اۋرۋلار كۇرت كوبەيگەن. 2011 جىلمەن سالىستىرعاندا ءبىز قازىر 38 پايىزعا كوبىرەك ولەمىز. بۇل - قورقىنىشتى ترەند. ءولىمدى تۋمەن عانا باسىپ وتىرۋعا بولمايدى، ءولىم سەبەپتەرىمەن سوڭىنا دەيىن كۇرەسۋ كەرەك.

كەي ەكونوميستەر اراسىندا حالىق سانىنا قاتىستى كەراعار پىكىرلەر بار. ازشىلىعى: "شيكىزاتتىق ەلدەرگە حالىق سانى از بولعانى ءتيىمدى. ادام از بولسا، ولار مۇناي رەنتاسىن كوبىرەك بولەدى، ادامدارعا اقشا كوپ تۇسەدى" دەگەن ويدا. بۇل وتە قاتە پىكىر دەر ەدىم. حالىق سانىنىڭ كوپتىگى، اسىرەسە جۇمىس رەسۋرستارىنىڭ بارشىلىعى - ەكونوميكالىق ءوسىمنىڭ العىشارتى. ايتپەسە، ەۋروپا ميگرانتتاردى تارتپاس ەدى.

حالىق سانى - شەتەلدىك ينۆەستيتسيالاردىڭ كەلۋىنە، B2C سەكتورىنىڭ (بۇقاراعا جۇمىس ىستەۋ: تاۋارىن، قىزمەتىن ساتۋ) دامۋىنا ەرەكشە يمپۋلس بەرەدى. اسىرەسە، كينەماتوگرافيانىڭ بولاشاعى حالىق سانىنا تىكەلەي بايلانىستى.

قازاقستاننىڭ ەڭ ۇلكەن پەرسپەكتيۆاسى - حالقى وتە جاس. بىزدە 18 جاسقا تولماعان بالالار سانى - 6,5 ميلليون. ال 30 جاسقا دەيىنگىلەر حالىق سانىنىڭ 60 پايىزىنان اسادى.

ايبار ولجاەۆ