ساياسي ناۋقانعا تولى بارىس جىلى دا وتە شىقتى. پرەزيدەنت توقاەۆ جاڭا قويان جىلعى ساياسي اۋىس-ءتۇيىستى بىرنەشە ءمينيستردى اۋىستىرۋدان باستادى. مادەنيەت ءمينيسترى بولىپ كەلگەن داۋرەن اباەۆ ورنىنان الىنىپ، «امانات» پارتياسىنىڭ حاتشىسى بولعان اسحات ورالوۆ رۋحاني سالانى قولعا الدى.

قاسىرەتتى قاڭتار وقيعاسىنان كەيىن قازاق قوعامى ساياسي وزگەرىستەرگە كۇپتى بولىپ، «جاڭا قازاقستان» دەپ جەلپىنگەن وتكەن جىلدا مادەنيەت مينيسترلىگىن باسقارعان داۋرەن اباەۆ جۇرت كوڭىلىنەن شىقتى دەپ ايتا المايمىز. سپورت سالاسىنداعى شەنەۋنىكتەر جونىندە نارازىلىق، جۇيەدەن مينيستر اباەۆتىڭ ۇستىنەن شاعىمدانعاندار دا از بولمادى. مادەنيەت سالاسىنداعى تەندەرلەر، ماقتاۋى اسىرىلعان «ايبوز» سىيلىعى دا داۋ دامايمەن ءوتتى. دەسە دە ايتپاعىمىز بۇل ەمەس ەدى.

قازىرگى مادەنيەتىمىزدىڭ قانداي كۇيدە ەكەنى جۇرتقا ايتپاسا دا تۇسىنىكتى. جاپپاي جەكەشەلەندىرۋدىڭ كەسىرىنەن بۇرىنعى مادەني ورتالىقتار جىن ويناققا اينالىپ، ەلدىڭ بايلىعىن زاڭسىز يەلەنىپ، اياق استىنان بايىپ شىعا كەلگەن ات توبەلىندەي توپ تاۋەلسىز ەلدىڭ مەديا، رۋحاني كەڭىستىگىن ۋىسىنا الىپ، مادەنيەتتىڭ مايەگىن كەتىرىپ، كوڭىل كوتەرۋدىڭ، ارزان ويىن-كۇلكىنىڭ دەڭگەيىنە ءتۇسىردى. قوعامدىق سانا تەرىستىك كورشىنىڭ، ءدىني اعىمداردىڭ، باتىستىق قۇندىلىقتاردىڭ قۇرساۋىندا قالدى. قاسىرەتتى قاڭتار وقيعاسىنىڭ تۋىنداۋىنا العى شارت ازىرلەدى.

جىل باسىندا پرەزيدەنت ساياسي رەفورما جاساۋعا ۋادە بەرىپ، سوعان ساي بۇرىن «نۇر وتان» بولىپ كەلگەن بيلىك پارتياسى «امانات» دەپ اتاۋىن وزگەرتىپ، جاڭا جاعدايعا بەيىمدەلگەن. پرەزيدەنت تە، اكىم قارالار دا بۇدان بىلاي ەشقانداي پارتياعا مۇشە بولمايدى دەپ ۋادە ەتىلىپ، زاڭدىق نەگىزدەرى بەكىتىلگەن. ءۇمىتشىل باسىمىز ەندى بيلىك پارتياسى ساياسي اكىمشىلىك رەسۋرستار ارقىلى ساياسي قوعامدىق اۋراعا جەكە دارا ءامىر جۇرگىزە المايتىن بولدى دەپ كەڭ تىنىستاپ قالعانبىز. قويان جىلىنىڭ باسىنداعى كادرلىق وزگەرىستەر، جاڭا تاعايىنداۋلار قۋانۋعا ءالى ەرتە ەكەنىن كورسەتتى.

سۋ جاڭا مادەنيەت ءمينيسترىنىڭ مانساپ جولىنا قاراساق، ىلعي دا كەشەگى «نۇر وتان» بۇگىنگى «اماناتتىڭ» پارتيا شتابىندا شىنىققان ەكەن. ياعني جاڭا قازاقستاننىڭ رۋحانياتىن تۇڭعىش پرەزيدەنتتىڭ پارتياسىندا قالىپتاسقان كادرلار پارتيادان ۇيرەنگەن، ەسكى يدەولوگيالىق تاسىلمەن باسقارادى دەگەن ءسوز.

بيلىك بىلە بىلسە ءتۇبىرلى ساياسي وزگەرىستەرگە قادام جاساۋدى ءدال وسى مادەنيەت سالاسىنان باستاۋى كەرەك ەدى. وكىنىشكە وراي ولاي بولمادى. اقتوتى رايىمقۇلوۆا سياقتى كومپوزيتور، مادەني سالادان شىققان مينيسترلەرگە زار بوپ قالاتىن ءتۇرىمىز بار. جاس تا بولسا يدەولوگيالىق سالادا ابدەن ىسىلعان ورالوۆتى رۋحاني سالاعا باسشى ەتۋ – بيلىكتىڭ وزدەرىن دە، قوعامدى دا جاڭارتۋعا قۇلىقسىزدىعىن كورسەتتى.

ەسبول ۇسەنۇلى

Abai.kz