McDonald's تاعامدانۋ جەلىسى قازاقستانداعى جۇمىسىن توقتاتادى. بۇل تۋرالى Bloomberg باسىلىمى حابارلاعان.

ونىڭ سەبەبى، McDonald's كومپانياسى جەرگىلىكتى فرانچايزينگكە ەتتى رەسەيدەن ساتىپ الۋعا تىيىم سالعان. الەمدەگى ەڭ ءىرى فاست-فۋد جەلىسى قازاقستان نارىعىندا 6 جىل جۇمىس ىستەدى.

بىلتىر قاراشادا McDonald's-تىڭ قازاقستانداعى مەيرامحانالارى جۇمىسىن ۋاقىتشا توقتاتقان بولاتىن. حابارلامادا ايتىلعانداي، مەيرامحانالاردى ۋاقىتشا جابۋعا ەت جەتكىزۋ بويىنشا شەكتەۋلەر سەبەپ بولعان.

كەيىن قر پرەمەر-ءمينيسترىنىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين قازاقستاندا McDonald’s-ءتىڭ جابىلۋى تۋرالى پىكىر بىلدىرگەن ەدى.

«بۇكىل اقپاراتتى سىزدەرگە ايتا المايمىن. ويتكەنى مەن العان اقپاراتتى كومپانيانىڭ باس كەڭەسى ءالى ماقۇلداماعان. بىراق ءبىرشاما كولەمدەگى تاۋار، 1000-عا جۋىق اتالىم يمپورتتالىپ كەلگەن. كەيبىرى وزىمىزدە شىعارىلاتىن. مىسالى، توقاشتاردى «بايسەركە-اگرو» شىعارىپ كەلدى. سوندىقتان قازىر قايتا قۇرىلىمداۋ ءجۇرىپ جاتىر. ءبىز كومپانيا باسشىلىعىنان ساۋدا مينيسترلىگى تاراپىنان قانداي كومەك كەرەك ەكەنىن سۇرادىق. تەحنيكالىق رەتتەۋ كوميتەتىنە جۇمىس جىلدامداۋى ءۇشىن سەرتيفيكاتسيا بويىنشا قانداي كومەك بەرە الاتىنىمىزدى قاراۋدى تاپسىردىم. بۇل باعىتتا جۇمىس ءجۇرىپ جاتىر»، - دەگەن ەدى سەرىك جۇمانعارين.

Abai.kz