بۇگىن ماجىلىستە دەپۋتاتتار وتكەن جىلدىڭ قاڭتار ايىندا بولعان قايعىلى وقيعالارعا قاتىستى باس پروكۋرور مەن قۇقىق قورعاۋ ورگاندارى باسشىلارىنىڭ اقپاراتىن ەكىنشى رەت تىڭدادى.

بۇل «جاڭا قازاقستان» دەپۋتاتتىق توبىنىڭ ساۋالىنا اۋىزشا جاۋاپ بولدى. وتىرىس قاڭتار وقيعاسى كەزىندە قازا تاپقانداردى ءبىر مينۋت ۇنسىزدىكپەن ەسكە الۋمەن باستالدى. ءماجىلىس سپيكەرى ەرلان قوشانوۆ ءوز سوزىندە دەپۋتاتتارعا قاڭتار وقيعاسى بيلىكتى باسىپ الۋدىڭ مۇقيات جوسپارلانعان ارەكەتى ەكەنىن انىق دالەلدەيتىن فاكتىلەر ۇسىنىلعانىن اتاپ ءوتتى. ال ونى ۇيىمداستىرۋشىلار ادامداردى جانە بەيبىت ميتينگىلەردى پايدالانىپ كەتتى.
– بۇل، اشىعىن ايتقاندا، تاۋەلسىزدىككە جاسالعان قاستاندىق بولاتىن! بىراق پرەزيدەنتىمىزدىڭ ەرىك-جىگەرى، حالقىمىزدىڭ اقىل-پاراساتى مەن بىرلىگى، قاتارداعى پوليتسەيلەردىڭ، دارىگەرلەردىڭ، ەرىكتىلەردىڭ ەرلىگى ارقاسىندا ءبىز مەملەكەتتىگىمىزدى قورعاپ، بەيبەرەكەتسىزدىككە جول بەرمەدىك، – دەدى ەرلان قوشانوۆ.

ءماجىلىس توراعاسى قاڭتار وقيعاسى تۋرالى اقپاراتتى قاساقانا بۇرمالاۋعا مۇددەلى توپتاردىڭ ەل ىشىندە دە، سىرتىندا دا بار ەكەنىن اتاپ ءوتتى.
– بىرلىگىمىزگە بالتا شاپقىسى كەلەتىن، ەلدىگىمىزگە سىنا قاققىسى كەلەتىن رەۆانشيستىك كۇشتەر از ەمەس. وسىنى ۇمىتپايىق. حالىقتىڭ ادىلەتتى قازاقستانعا دەگەن ءۇمىتى ويانىپ، سەنىمى ارتىپ كەلەدى. بارشامىزدىڭ الدىمىزدا بۇرىنعىدان دا ماڭىزدى، زور مىندەتتەر تۇر. ءبىز قاسىم-جومارت كەمەلۇلى توقاەۆ قولعا العان رەفورمالاردى ىسكە اسىرۋ جولىندا تاس-ءتۇيىن ۇيىسۋعا ءتيىسپىز، – دەدى ەرلان قوشانوۆ.

وتىرىس سوڭىندا ءماجىلىس توراعاسى قاڭتار وقيعاسىنىڭ بولاشاقتا قايتالانباۋى ءۇشىن ساباق الۋ ماڭىزدى ەكەنىن ايتتى.
جالپى وتىرىستا باس پروكۋرور، ىشكى ىستەر ءمينيسترى، قوعام بەلسەندىلەرى مەن ءماجىلىس دەپۋتاتتارى ءسوز سويلەدى. سونىمەن قاتار وقيعانىڭ بەل ورتاسىندا بولىپ، سول كۇندەردىڭ تىكەلەي كۋاگەرلەرى – پوليتسيا قىزمەتكەرلەرى، دارىگەرلەر، كاسىپكەرلەر مەن ەرىكتىلەر دە پىكىرىمەن ءبولىستى.
ۇكىمەت مۇشەلەرى قاڭتار وقيعاسىنىڭ قايتالانۋىن بولدىرماۋ ماقساتىمەن مەملەكەت تاراپىنان قابىلدانىپ جاتقان شارالار تۋرالى دەپۋتاتتاردىڭ ساۋالدارىنا جاۋاپ بەردى.

جيىن رەسپۋبليكالىق تەلەارنا مەن ينتەرنەت ارقىلى تىكەلەي ەفيردە كورسەتىلدى.
جالپى وتىرىس الدىندا تەرگەۋ بارىسىندا تابىلعان قارۋ-جاراق كورمەسى ۇيىمداستىرىلدى.
سونداي-اق كورمەگە تارتىپسىزدىك كەزىندە پوليتسەيلەردىڭ بۇلىنگەن كيىمدەرى – قالقاندار، باس كيىمدەر، وق وتكىزبەيتىن كەۋدەشەلەر قويىلدى.

Abai.kz