قىرعىزستاننىڭ سىرتقى ىستەر مينيسترلىگى قاڭتار وقيعاسىنا شەتەلدىكتەردىڭ قاتىسقانى جايلى قازاقستاندىق پروكۋروردىڭ ءسوزىن تەرىسكە شىعاردى. قازاقستاننىڭ باس پروكۋرورى بەرىك اسىلوۆ 5 قاڭتار كۇنى ماجىلىستە قاڭتار وقيعالارى بويىنشا تەرگەۋ قورىتىندىلارىن مالىمدەگەن بولاتىن.

ول وزبەكستان، رەسەي، قىرعىزستان جانە تاجىكستان ازاماتتارىنىڭ  جاپپاي تارتىپسىزدىككە قاتىسقانىن ايتقان.

«قازاقستان رەسپۋبليكاسىنىڭ باس پروكۋرورى بەرىك اسىلوۆ بۇگىن پارلامەنتتىك تىڭداۋدا 2022 جىلعى قاڭتارداعى تارتىپسىزدىككە قىرعىز رەسپۋبليكاسى ازاماتتارىنىڭ قاتىسقانى جايلى مالىمدەمە جاسادى. وسىعان بايلانىستى مينيسترلىك قىرعىز رەسپۋبليكاسى ازاماتتارىنىڭ قاڭتار وقيعالارىنا قانداي دا ءبىر قاتىسى بارىن تۇبەگەيلى جوققا شىعارادى. سونىمەن قاتار، جاپپاي تارتىپسىزدىك فاكتىسى بويىنشا قىلمىستىق ىستەردى تەرگەۋ كەزىندە قىرعىزستاننىڭ ەكى ازاماتى شارتتى مەرزىمدە جازا وتەۋ تۇرىندە جاۋاپقا تارتىلدى. بۇل ازاماتتار وزدەرىنە تاۋەلدى ەمەس ءمان-جاي بويىنشا كەزدەيسوق جەكە ەپيزودقا تارتىلدى»، - دەپ جازىلعان سىرتقى ىستەر مينيسترلىگىنىڭ رەسمي مالىمدەمەسىندە.

مينيسترلىك قىرعىز رەسپۋبليكاسىنىڭ باسقا ازاماتتارىنىڭ جاۋاپكەرشىلىگى مەن كىناسى دالەلدەنبەگەنىنە باسا نازار اۋداردى.

«قىرعىزستاننىڭ ءبىر دە ءبىر ازاماتى قازاقستانداعى ميتينگىلەرگە، جاپپاي تارتىپسىزدىك پەن توناۋعا قاتىسقان جوق. قىرعىزستان سىرتقى ىستەر مينيسترلىگى جانە قىرعىزستاننىڭ شەت ەلدەردەگى مەكەمەلەرى 2022 جىلعى قاڭتار وقيعاسىندا قازاقستانداعى قىرعىز رەسپۋبليكاسى ازاماتتارىنىڭ قۇقىقتارى مەن مۇددەلەرىن قورعاۋدى قامتاماسىز ەتۋ بويىنشا جان-جاقتى جۇمىس جۇرگىزدى، ونىڭ ىشىندە 600-دەن استام قىرعىزستاندىق جەدەل تۇردە ەۆاكۋاتسيالاندى»، - دەيدى مينيسترلىك.

Abai.kz