ءدال قازىر اسكەردە مەرزىمدى اسكەري بورىشىن وتەپ جۇرگەن 6,4 مىڭ ساربازدىڭ نەسيەسى بار. ولاردىڭ 2,4 مىڭى قارىزىن ۋاقتىلى تولەي الماي ءجۇر، دەپ جازادى Ulysmedia.kz.

مەملەكەتتىك كرەديتتىك بيۋرونىڭ مالىمەتىنە سۇيەنسەك، بانكتەر مەن ميكروقارجى ۇيىمدارىنان نەسيە العان 6,9 مىڭ ادام اسكەرگە كەتىپ قالعان. ولاردىڭ جالپى قارىزى 2,2 ملرد تەڭگە ەكەن. سول التى جارىم مىڭعا جۋىق ادامنىڭ ىشىندە 2,4 مىڭى 872 ملن تەڭگە قارىزىن تولەمەگەن. ياعني ولاردىڭ نەسيەنى تولەۋ مەرزىمى 90 كۇننەن اسىپ كەتكەن. جاستاردىڭ مىڭ جارىمىن بانكتەر، 1,2 مىڭىن ميكروقارجى ۇيىمدارى ىزدەپ ءجۇر.

«مەرزىمدى اسكەري قىزمەتكە شاقىرىلعان ازاماتتاردىڭ نەسيەسىنىڭ تولەنبەي قالۋىنا جول بەرمەس ءۇشىن قارجى نارىعىن رەتتەۋ جانە دامىتۋ اگەنتتىگى مەن قورعانىس مينيسترلىگى مەموراندۋم ارقىلى كەلىسكەن. وعان سايكەس، اسكەردەگى جاستارعا بانك قارىزى مەن ميكرونەسيەلەر تولەمىن كەيىن تولەۋ مۇمكىندىگى بەرىلەدى. اتالعان ماسەلەنى رەتتەۋ ءۇشىن قارىزىن وتەي الماعان ساربازداردىڭ ءتىزىمى تاياۋدا بانكتەر مەن ميكروقارجى ۇيىمدارىنا جولداپ وتىر»، - دەيدى دەپۋتاتتاردىڭ ساۋالىنا جاۋاپ بەرگەن ۇكىمەت باسشىسى ءاليحان سمايىلوۆ.

Abai.kz