ىشكى ىستەر مينيسترلىگىنىڭ اپتالىق بريفينگىندە ەلىمىزدە 2 مىڭعا جۋىق ەسىرتكى ساتاتىن سايت بۇعاتتالعانى ايتىلدى.

وتكەن اپتادا مەملەكەت باسشىسى ىشكى ىستەر ءمينيسترى مارات احمەتجانوۆتى قابىلداعانى بەلگىلى. پرەزيدەنتكە ۆەدومستۆونىڭ 2022 جىلعى اتقارعان جۇمىسى جانە الداعى كەزەڭگە ارنالعان جوسپارلارى تۋرالى ەسەپ ۇسىنىلدى.

قاسىم-جومارت توقاەۆقا ەل بويىنشا كىسى ءولتىرۋ سانىن ەداۋىر ازايتۋعا مۇمكىندىك بەرگەن قۇقىق بۇزۋشىلىقتاردىڭ الدىن الۋ بويىنشا قابىلدانىپ جاتقان شارالار تۋرالى حابارلاندى. ونىڭ ىشىندە ۇرلىق پەن مال ۇرلىعى فاكتىلەرىن اشۋ جۇمىستارى كۇشەيتىلدى. مينيستر مارات احمەتجانوۆتىڭ ايتۋىنشا، ۇيىمداسقان قىلمىسقا قارسى ءىس-قيمىل تاسىلدەرىن وزگەرتۋ ارقىلى ولاردىڭ ورىن الۋ سەبەپتەرى مەن جاعدايلارىن جانە قارجىلاندىرۋ كوزدەرىن جويۋعا باسا نازار اۋدارا وتىرىپ، ۇيىمداسقان قىلمىستىق توپتاردىڭ (وپگ) 24 كوشباسشىسى مەن 114 مۇشەسى ۇستالدى، - دەپ اتاپ ءوتتى ۆەدومستۆو وكىلى شۇعىلا تۇرلىبەك.

سونداي-اق پرەزيدەنتكە كيبەرقىلمىسپەن كۇرەس بويىنشا قابىلدانىپ جاتقان شارالار تۋرالى ەسەپ بەرىلگەن.

ينتەرنەت-الاياقتىققا قارسى ءىس-قيمىل جونىندەگى كەشەندى شارالاردى ىسكە اسىرۋ شەڭبەرىندە ۇيالى بايلانىس كومپانيالارى «اۋىستىرىلمالى» 1 نومىرلەرىنەن 5,5 ملن قوڭىراۋدى بۇعاتتادى. ىشكى ىستەر مينيسترلىگى 6 ۇيىمداسقان قىلمىستىق توپتى جويىپ، الاياقتىق بەلگىلەرى بار 165 سايتتىڭ جۇمىسىن توقتاتتى. بۇدان باسقا، ءىىم باسقا قۇقىق قورعاۋ جانە ارنايى ورگاندارمەن بىرلەسىپ، 2781 ەسىرتكى قىلمىسى انىقتالدى، زاڭسىز اينالىمنان 15 توننادان استام ەسىرتكى تاركىلەندى جانە 70 ەسىرتكى زەرتحاناسى جويىلدى، سونداي-اق 1990 ەسىرتكى سايتى بۇعاتتالدى، - دەدى شۇعىلا تۇرلىبەك.

Abai.kz