قازاقستاندا سەناتتاعى 20 ورىننان 55 كانديدات ءۇمىتتى. ولاردى 3168 ءماسليحات دەپۋتاتى سايلايدى. 12 قاڭتاردا ورتالىق سايلاۋ كوميسسياسىنىڭ وتىرىسى كەزىندە وسك جەتەكشىسى نۇرلان ءابدىروۆ وسىلاي دەپ مالىمدەدى.

بۇل جونىندە "ۆلاست" سايتى جازدى. "سايلاۋ كوميسسيالارى بەرگەن مالىمەتكە سۇيەنسەك، سايلاۋ بيۋللەتەندەرىنە جالپى 55 كانديدات ەنگىزىلگەن. الماتىدان – 4 كانديدات، الماتى، جەتىسۋ، جامبىل، پاۆلودار، سولتۇستىك قازاقستان، تۇركىستان وبلىستارىنىڭ ارقايسىسىنان ەكى كانديدات قاتىسادى. قالعان ايماقتار مەن شىمكەنت، استانا قالالارىنان ءۇش كانديداتتان قاتىسادى" دەدى ءابدىروۆ.

سايلاۋشىلار تىزىمىندە 3 168 ءماسليحات دەپۋتاتىنىڭ اتى-ءجونى بار. ولاردىڭ باسىم بولىگى تۇركىستان (317) جانە قوستاناي وبلىسىنان (263).

قازاقستاندا پارلامەنت سەناتىنا دەپۋتات سايلاۋ 14 قاڭتاردا وتەدى. سەناتقا 17 وبلىستان، استانا، الماتى جانە شىمكەنت قالالارىنان جيىنى 20 دەپۋتات سايلانادى. سەنات دەپۋتاتىن سايلاۋ جاناما سايلاۋ جولىمەن وتەدى، ياعني جوعارعى پالاتا دەپۋتاتتارىن حالىق ەمەس، جەرگىلىكتى ءماسليحات دەپۋتاتتارى سايلايدى.

بۇعان دەيىن كانديدات بولىپ تىركەلە الماعان كەمى ءۇش بەلسەندى كونستيتۋتسيالىق قۇقىعى بۇزىلعانىنا شاعىمدانىپ، سايلاۋ كوميسسياسىن سوتقا بەرگەن. ايتۋلارىنشا، كانديدات بولۋعا كونستيتۋتسيادا قۇقىعى بار، بىراق باستى زاڭنان تومەن "سايلاۋ تۋرالى" زاڭدا شەكتەۋ قويىلعان. بيلىك ورگاندارى بۇعان رەاكتسيا بىلدىرمەدى.

Abai.kz