قر ادىلەت ءمينيسترى ازامات ەسقاراەۆ نۇرسۇلتان نازارباەۆتىڭ بۇرىنعى مارتەبەلەرىمەن بايلانىستى كەڭسە، رەزيدەنتسيالاردىڭ تاعدىرى قالاي بولاتىنىن ءتۇسىندىردى.

«ەلباسى كەڭسەسى، ەلباسى كىتاپحاناسى، رەزيدەنتسيالارىنىڭ تاعدىرى نە بولادى؟ الماتى وبلىسىنداعى اۋىلىنداعى مۇلىكتەر مەملەكەت مەنشىگىنە قايتارىلا ما؟» دەپ سۇرادى جۋرناليستەر مينيستردەن.

ازامات ەسقاراەۆتىڭ سوزىنە قاراعاندا، پرەزيدەنت تۋرالى زاڭ بويىنشا ەندى نۇرسۇلتان نازارباەۆقا مەملەكەت تاراپىنان قىزمەتتىك ساياجاي مەن پاتەر عانا تيەسىلى بولۋى مۇمكىن.

«بۇل ماسەلە بۇگىن كۇشىن جويۋعا ۇسىنىلعان زاڭدا كوزدەلگەن. ەلباسى تۋرالى زاڭ كۇشىن جويادى. سوندىقتان، زاڭنامادا كوزدەلگەن تارتىپپەن وسى كەڭسە، تاعى باسقا ماسەلەلەر جان-جاقتى قارالادى. ال رەزيدەنتسيالارعا كەلسەك، ەكس-پرەزيدەنتكە مەملەكەتتىك ساياجاي كوزدەلۋى مۇمكىن. سوندىقتان بۇل زاڭناما شەڭبەرىندە شەشىلەدى. سىزدەر ايتىپ تۇرعان ەلباسى كەڭسەسى مەن تۇڭعىش پرەزيدەنت كىتاپحاناسى تۋرالى دا زاڭ تارتىبىمەن ءتيىستى شەشىم شىعارىلادى»، - دەدى ادىلەت ءمينيسترى.

Abai.kz