سىرت ەلدەن اكەلىنگەن اۆتوكولىكتى زاڭداستىرۋعا قانشا سوما كەرەك؟ اتالعان ساۋالعا ىشكى ىستەر مينيسترلىگى اكىمشىلىك پوليتسيا كوميتەتى توراعاسىنىڭ مىندەتىن اتقارۋشى قايسار سۇلتانباەۆ جاۋاپ بەردى، دەپ حابارلايدى قازاقپارات ءتىلشىسى.

«كولىك قۇرالىن تىركەۋ ءۇشىن مامانداندىرىلعىن حالىققا قىزمەت كورسەتۋ ورتالىعى ارقىلى 200 مىڭ تەڭگە كولەمىندە بىررەتتىك تولەم جاسالادى. تەحپاسپورت ءۇشىن 4 313 تەڭگە مەملەكەتتىك باج بار. سونداي-اق كولىك يەسى مەملەكەتتىك ءنومىر ءۇشىن 9 660 تەڭگە مولشەرىندە الىم تولەيدى. بارلىق قۇجات تەكسەرىلىپ، تولەم جاسالعاننان كەيىن اۆتوموبيل يەسىنە قازاقستان رەسپۋبليكاسىنىڭ تىركەۋ قۇجاتى مەن مەملەكەتتىك ءنومىر بەرىلەدى»،- دەدى قايسار سۇلتانباەۆ اتالعان ۆەدومستۆودا وتكەن بريفينگىدە.

ونىڭ ايتۋىنشا، شەتەلدىك كولىكتى ءبىر رەت تىركەپ، زاڭداستىرۋ جەتىپ جاتىر.

«بۇدان بىلاي قازاقستان ازاماتتارى شەتەلدەن اكەلىنگەن اۆتوكولىكتى ۋاقتىلى تىركەۋ تالابىن ساقتاۋى قاجەت. ياعني ەل اۋماعىنا كىرگەننەن كەيىن 10 جۇمىس كۇنى ىشىندە زاڭداستىرۋى ءتيىس»، - دەيدى ول.

ودان بولەك مينيسترلىك وكىلى كولىگىن زاڭداستىرعان ازاماتتاردىڭ ۋتيل الىمنان بوساتىلاتىنىن ايتتى.

بۇعان دەيىن ق.سۇلتانباەۆ شەتەلدىك كولىكتى زاڭداستىرۋ ءۇشىن قانداي قۇجاتتار كەرەكتىگىن ايتقان بولاتىن. قۇجات تاپسىرۋ 23 قاڭتاردا باستالادى.

Abai.kz