"قازاقپارات" اگەنتتىگىنىڭ جازۋىنشا، 36 مەن 40 جاس ارالىعىنداعى ءتورت ادام – دانيار ابدىعاپاروۆ، جۇمادين پاتوۆ، قانات جاقاەۆ پەن ايدوس نۇرقاليەۆتەر "اسا ءىرى كولەمدەگى الاياقتىق جاسادى" دەگەن كۇدىككە ىلىنگەن.

بىلتىر كوكتەمدە الەۋمەتتىك جەلىدە "التىن وردا" بازارىنىڭ باستىعى دەلىنەتىن دانيار ابدىعاپاروۆتىڭ ۆيدەوسى تاراعان ەدى. ۆيدەودا ول قازاقستان پرەزيدەنتى قاسىم-جومارت توقاەۆقا ۇندەۋ جاساپ، "بازاردى رەيدەرلىك جولمەن تارتىپ الىپ جاتىر" دەگەن.

"التىن وردا" بازارىنىڭ باسشىلىعى وزگەرگەنى جايلى قاڭتار وقيعاسىنان كەيىن باق كوپ جازدى. اقپاندا پرەزيدەنت توقاەۆ "التىن وردا" بازارىندا ءتارتىپ ورناتۋدى تاپسىرعان. "بۇل جەر پايداكۇنەمدەرگە ناعىز مايشەلپەككە اينالدى. بۇعان الماتىداعى قاڭتار وقيعاسى كەزىندە انىق كوز جەتكىزدىك. بۇل باسقا وڭىرلەرگە دە قاتىستى ماسەلە. قاجەت بولسا، بۇل جۇمىسقا قۇقىق قورعاۋ ورگانى وكىلدەرى اتسالىسسىن. ەكى اي ۋاقىت بەرەمىن", – دەگەن ەدى توقاەۆ.

اقپارات قۇرالدارى 2021 جىلى قاراشادا بازاردى جابۋ تۋرالى سوت شەشىمى شىققانىن حابارلاعان. اقپاراتقا قاراعاندا، سالىق ورگاندارى سوتقا "التىن وردا بازارى" جاۋاپكەرشىلىگى شەكتەۋلى سەرىكتەستىگىن جويۋ كەرەك دەپ شاعىم تۇسىرگەن. وعان بازار باسشىلارىنىڭ سالىق مىندەتتەمەلەرىن ورىنداماۋى تۇرتكى بولعان. سوت شاعىمدى قاناعاتتاندىرىپ، شەشىم كۇشىنە ەنگەن. اشىق دەرەككوزدەرگە سۇيەنگەن Exclusive.kz سايتى 2012 جىلى قۇرىلعان "التىن وردا" بازارىنىڭ جىلدار بويى مۇلدە سالىق تولەمەگەنىن جازادى. سايت بازار باسشىسىنىڭ بۇرىنعى پرەزيدەنت نۇرسۇلتان نازارباەۆتىڭ تۋعان ءىنىسى بولات نازارباەۆپەن بىرگە ورتاق بيزنەسى بار دەيدى.

بولات نازارباەۆ بۇل ماسەلە جونىندە ەشقانداي تۇسىنىكتەمە بەرگەن جوق.

بۇعان دەيىن الماتى وبلىسىنىڭ مونوپولياعا قارسى دەپارتامەنتى "Altyn Orda QazTrade LTD" كومپانياسىنا قارسى اكىمشىلىك ءىس قوزعاعان. سوت كومپانيادان "مونوپوليالىق جولمەن باعانى كوتەرۋ ارقىلى الىنعان" 46 ميلليون تەڭگە تابىسىن تاركىلەپ، 1,4 ميلليون تەڭگە مولشەرىندە ايىپپۇل سالعان.

Abai.kz