كەشە «قازاقستان حالىق پارتياسى» ءماجىلىس سايلاۋىنا تۇسۋگە مۇمكىندىگى بار جەتى پارتيانىڭ العاشقىسى بولىپ كەزەكتى سەزىن وتكىزدى. جيىن بارىسىندا پارتيانىڭ جاڭا توراعاسى ەرمۇحامەت ەرتىسباەۆ باستاعان، ورىنباسارى يرينا سميرنوۆا قوستاعان، دەپۋتاتتىق دوداعا تۇسەتىن 52 ۇمىتكەردىڭ ءتىزىمىن جاريالادى.

پرەزيدەنتتىك سايلاۋدا ەرەكشە بەلسەندىلىك تانىتقاندارىن العا تارتقان ەرتىسباەۆ مىرزا جەڭىسكە جەتكەن جاعدايدا، پارلامەنت پارتاسىنا ءوزىن ەمەس، وزگە ارىپتەستەرىن الدىمەن وتىرعىزۋعا دايىن ەكەنىن جەتكىزدى. بۇل ءسوزدىڭ پارتيا قۇرامىنان ىركەس-تىركەس شىعىپ كەتكەن عازيز قۇلاحمەت، جامبىل احمەتوۆتارعا قاراتىپ ايتىلعانى ايتپاسا دا تۇسىنىكتى. قىرعىزستاندا تۋىلسا دا بۇدان بۇرىن ەكى كەزەك قازاق پارلامەنتىنىڭ دەپۋتاتى بولعان سميروۆا حانىمنىڭ ايتۋىنشا نەگىزگى زاڭعا ەنگىزىلگەن «جەر – حالىقتىڭ مەنشىگى» دەگەن باپ تا، پرەزيدەنتتىڭ 2024 جىلدان باستاپ دۇنيەگە كەلگەن نارەستەگە جەكە ەسەپشوت اشۋ باستاماسى دا اتاعى دارداي «اماناتتىڭ» ەمەس، اتالمىش پارتيانىڭ ۇسىنىسى ەكەن.

ال ورتالىق سايلاۋ كوميسياسىنىڭ رۇقساتىمەن جۇرگىزىلدى دەلىنگەن «قوعامدىق پىكىر» زەرتتەۋ ينيستيتۋتىنىڭ تەلەفون ارقىلى وتكىزىلگەن ساۋالناماسى بويىنشا (1200 ادام قاتىسقان): داۋىس بەرۋشىلەردىڭ 48,6 پايىزى «اماناتتى»، 6,2 پايىزى «اۋىلدى»، 5,4 پايىزى «اق جولدى»، 4,8 پايىزى عانا «حالىق پارتياسىن» قولداعان. پارلامەنتكە ءوتۋدىڭ شەكتى داۋىس مولشەرىنىڭ 7 پايىزدان 5 پايىزعا تۇسكەنىن، بۇرىنعى كوممۋنيتەردىڭ سونى دا جيناي الماعانىنا قاراپ اۋسايدەر ساناساڭىز، وڭباي قاتەلەسەسىز.

قىزىلدار پارتياسى ءماجىلىس سايلاۋىنا پارتيالىق تىزىمنەن بولەك، ماجوريتاللىق جۇيە بويىنشا 15 ۇمىتكەر، ءماسيليحات سايلاۋىنا 700 مۇشەسىن ساقاداي سايلاپ وتىر ەكەن. ميلليوننان اسىپ جىعىلاتىن ۇمىتكەرلىك جارنانى قالتاسىنان ويلانباي سۋىرىپ بەرەتىن شەتىنەن بيزنەسمەن، قارماعىندا ادامى بار اتقامىنەرلەر.

ەسكى كوممۋنيستىك پارتيا سەزىنىڭ تاعى ءبىر جاڭالىعى بۇرىن «نۇر وتاننىڭ» شاشباۋىن كوتەرىپ كەلگەن «وتانداس ەل» قوعامدىق بىرلەستىگى «حالىق» پارتياسى جاعىنا ءوتىپتى. دەپۋتاتتىقتان ۇمىتكەرلەر تىزىمىنە ەنگەن ۇيىم باسشىسى مۇقان مامىتقان مىرزا: «مەنىڭ 27 جىل بويى اينالىسىپ جۇرگەن ماسەلەمنىڭ ءبىرى – كوشى-قون. قانداستار ماسەلەسىن شەشۋدە قحپ ەرتىسباەۆ ەرەكشە قولداۋ كورسەتكەن ەدى» دەپ اعىنان جارىلىپتى. سىرت كوزگە مۇقان مىرزا ەكسپرەزيدەنت نازارباەۆتى ەرتىسباەۆپەن شاتاستىرىپ العان جوق پا دەگەن وي كەلەتىنى انىق. بۇل جايىندا الەۋمەتتىك جەلى دە ءار ءتۇرلى پىكىرلەر ايتىلىپ جاتىر ەكەن. ءبىرى «"وتانداس ەل" اتتى رەسپۋبليكالىق قوعامدىق ۇيىمدى 20 جىل باسقارىپ كەلە جاتقان مۇقان مامىتحان دا شيازعا دەلەگات بوپ قاتىسىپتى. دەمەك، حالىقتى قانداستارىمىز دا قولدايدى دەگەن ءسوز عوي سوندا؟» دەپ جازسا، رۋسلان ەربوتا:«قايتالاپ ايتايىن، قانداستار اراسىنداعى وتباسىلىق، تۋىستىق، اعايىندىق، ەلدىك، بىرىگىپ كاسىپ ەتۋدەگى تاماشا قارىم-قاتىناستان، بەرىك بايلانىستان اسىپ كەتكەن ەلەكتورات ەلدە جوق. ءتىپتى، بۇرىن ءبىر اۋىزدان داۋىس بەرىپ كەلگەن زاۋىت جۇمىسشىلارىنىڭ ىنتىماعى بۇگىندە قانداستاردىڭ بىرلىگىنە جەتپەيدى.

ەلدىڭ مادەنيەتىنە، ونەرىنە، بيزنەسىنە وسىعان دەيىن ەرەكشە اتسالىسىپ كەلگەن قانداستار وسى ەرەكشەلىكتى ەسكەرىپ، ەل باسقارۋ جۇيەسىنەن شەتتەپ جۇرە بەرمەي، ساياساتقا دەن قويىپ، اۋدان، قالا، اۋداندىق، وبلىستىق ءماسليحات، ءتىپتى ءماجىلىس سايلاۋلارىنا ءتۇسۋى كەرەك. سايلاۋدا تاۋەلسىز باقىلاۋشى بولىپ، ازاماتتىق قوعامنىڭ دامۋىنا ۇلكەن ۇلەس قوسۋلارى شارت» دەپ تۇيىندەپتى. «حالىق» پەن «وتانداس ەل» – ەرتىسباەۆ پەن مۇقان ارىپتەستىگىنىڭ ەكى ۇيىمنىڭ، ەكى باسشىنىڭ ساياسي تاڭداۋى ەكەنى، بارشا قانداسقا وكىلدىك ەتە المايتىنى ايتپاسا دا تۇسىنىكتى.

ەسبول ۇسەنۇلى

Abai.kz