اقش ماسكەۋدى ستراتەگيالىق شابۋىل قارۋلارىن شەكتەۋ تۋرالى شارت ەرەجەلەرىن ورىنداۋدان اينىپ، تەكسەرۋگە رۇقسات بەرمەي وتىر دەپ ايىپتادى.

اقش مەملەكەتتىك دەپارتامەنتى مالىمدەمەسىندە "رەسەيدىڭ تەكسەرۋ قىزمەتىنە كومەكتەسۋدەن باس تارتۋى اقش-قا كەلىسىم بويىنشا ماڭىزدى قۇقىقتاردى جۇزەگە اسىرۋعا مۇمكىندىك بەرمەيدى جانە امەريكا مەن رەسەيدىڭ يادرولىق قارۋدى باقىلاۋ مۇمكىندىگىنە قاتەر توندىرەدى" دەپ جازعان.

اقش مەملەكەتتىك دەپارتامەنتى وكىلىنىڭ ايتۋىنشا، رەسەيدىڭ ءالى دە شارتقا ورالۋىنا مۇمكىندىگى بار. "ۆاشينگتون ونىمەن بۇرىنعىشا شارت بويىنشا جۇمىس ىستەۋگە دايىن" دەدى دەپارتامەنت وكىلدەرى.

ماسكەۋ مەن ۆاشينگتون New START كەلىسىمى بويىنشا تەكسەرۋدى جالعاستىرۋ تۋرالى كەلىسسوزدى قاراشادا جۇرگىزۋى كەرەك بولعان. بىراق رەسەي كەزدەسۋدى شەگەرگەن جانە تاراپتار ءالى كۇنگە دەيىن جاڭا مەرزىم بەلگىلەگەن جوق.

Reuters-ءتىڭ جازۋىنشا، اتالعان شارت قىرعيقاباق سوعىسى اياقتالعالى بەرگى ەكى ەلدىڭ يادرولىق قارۋىن باقىلاۋعا ارنالعان ماڭىزدى تەتىك سانالادى. New START 2011 جىلى كۇشىنە ەنگەن جانە 2021 جىلى تاعى بەس جىلعا سوزىلعان. ول اقش پەن رەسەيدىڭ يادرولىق وقتۇمسىقتارىنىڭ سانىن شەكتەپ وتىرادى.

رەسەي مەن اقش-تىڭ يادرولىق ارسەنالى الەمدەگى يادرولىق وقتۇمسىقتاردىڭ جالپى سانىنىڭ 90 پايىزىنداي بولادى. رەسەيدىڭ ۋكرايناعا باسقىنشىلىعى باستالعالى بەرى ماسكەۋ مەن ۆاشينگتوننىڭ قارىم-قاتىناسى كەيىنگى 20-30 جىل ىشىندە بولىپ كورمەگەن تومەن دەڭگەيگە ءتۇستى. بۇل امەريكا پرەزيدەنتى دجو بايدەن اكىمشىلىگىنە رەسەيمەن اراداعى كەلىسىمدەردى ساقتاپ، جالعاستىرۋدى قيىنداتىپ جىبەرۋى مۇمكىن.

Abai.kz