ەكونوميكا ءمينيسترى الىبەك قۋانتىروۆ بيىل كوكتەمنەن باستاپ قازاقستاندا كوممۋنالدىق قىزمەت 10-25 پايىزعا دەيىن قىمباتتايتىنىن ايتتى.

كوممۋنالدىق قىزمەت اسىرەسە ريددەر جانە ەكىباستۇز قالالارىندا وسەدى. بىلتىر جىلدىڭ اياعىندا بۇل قالالاردا اپات بولىپ، تۇرعىندار جىلۋسىز قالعان ەدى.

ءمينيستردىڭ سوزىنشە، تاريفتەردىڭ كوتەرىلۋى ايماقتى جىلۋمەن قامتاماسىز ەتەتىن ۇيىمداردىڭ جۇمىسىنا جانە جىلۋ جۇيەسى توزعانىنا بايلانىستى. ەكىباستۇزداعى جىلۋ ەلەكتر ورتالىعى بۇعان دەيىن ءتاريفتى 107 پايىز كوتەرۋدى سۇراعان، بىراق قۋانتىروۆ مينيسترلىك مۇندايعا جول بەرە المايتىنىن جەتكىزدى.

"ەڭ جوعارعى تاريف ەكىباستۇزدا بولادى، ويتكەنى ونداعى جۇيە توزعان. ەڭ كوپ قىمباتتايتىن جىلۋ سول جاقتا بولادى. ولار ءتاريفتى ەكى ەسە كوتەرۋدى سۇراعان. بىراق ءبىز وعان كەلىسپەي وتىرمىز. سونىمەن بىرگە ريددەردە دە جوعارى تاريف بولاتىن شىعار. جىلۋ باعاسى 1 ناۋرىزدان نە 1 ساۋىردەن باستاپ كوتەرىلۋى مۇمكىن" دەدى الىبەك قۋانتىروۆ.

ءمينيستردىڭ سوزىنشە، ەكىباستۇزداعى جەو يەسى ونى جاڭارتۋعا قارجى قۇيىپ، ورتالىق قىزمەتىنە جاۋاپكەرشىلىك الۋى كەرەك. سوندىقتان شىعىننىڭ جارتىسى بيۋدجەتتەن الىنادى، ەكىنشى بولىگى تۇرعىنداردان جينالادى.

وتكەن اپتادا شىعىس قازاقستان وبلىسىنىڭ ريددەر قالاسىنداعى جەو-عا ينۆەستور كەلگەنى حابارلانعان. الايدا ونىڭ ەسىمى جاريالانبادى.

قاراشانىڭ اياعىندا ەكىباستۇزداعى جىلۋ ەلەكتر ورتالىعىنداعى ءىرى اپاتتان كەيىن جۇزدەگەن ءۇي مەن الەۋمەتتىك نىسان قاقاعان ايازدا جىلۋسىز قالعان ەدى. مونوقالادا تەحنوگەندى سيپاتتاعى توتەنشە جاعداي جاريالانىپ، 8 جەلتوقسانعا دەيىن كۇشىندە بولدى. تۇرعىن ۇيلەردىڭ كوبىندە جىلۋ رادياتورلارى، سۋ قۇبىرلارى جارىلعان، كارىز جەلىلەرى قاتىپ قالعان.

اپات سالاداعى پروبلەمالاردى اڭعارتتى: ينفراقۇرىلىم توزعان جانە باقىلاۋ جاعى ناشار. "قازاندىقتار جەو ماماندارىنىڭ كىناسىنەن جۇمىس ىستەمەي قالدى" دەگەن رەسمي تۇسىنىك بەرىلدى. سىبايلاس جەمقورلىققا قارسى ءىس-قيمىل اگەنتتىگى بۇل توتەنشە جاعداي سالاداعى جۇيەلى جەمقورلىقپەن دە بايلانىستى دەپ مالىمدەگەن. قازاقستاندا جىلۋ ەلەكتر ورتالىقتارىنىڭ يەلەرى مودەرنيزاتسيا جۇرگىزۋگە مۇمكىندىك بەرمەيتىن تومەن تاريفكە شاعىمدانادى. ساراپشىلار "كوممۋنالدىق تولەم رەتىندە جينالعان قارجى جۇمساۋدا اشىقتىق جوق" دەيدى.

Abai.kz