ەكىباستۇز قالاسىن جىلۋمەن تۇراقتى قامتۋ پروبلەماسى جىلىتۋ ماۋسىمى اياقتالعانعا دەيىن شەشىمىن تاپپاۋى مۇمكىن. بۇل تۋرالى «پاۆلودارەنەرگو» اق باس ديرەكتورى ۆاديم لەسين ايتتى، دەپ حابارلايدى Pavlodarnews.kz سايتى.

سونداي-اق انىقتالعانداي، ەكىباستۇز ستانتسياسى جىلىتۋ ماۋسىمىنا دايىندىق پاسپورتىن الماعان بولىپ شىقتى.

وڭىرلىك كوممۋنيكاتسيالار قىزمەتىندە وتكەن ءباسپاسوز ءماسليحاتىندا ۆ.لەسين قازاندىقتاردىڭ، اسىرەسە سۋ جىلىتقىش قازاندىقتاردىڭ جاي-كۇيى تۇراقتى تەمپەراتۋرا بەرە المايتىنىن ءمالىم ەتتى.

«وسىعان بايلانىستى تومەندەتىلگەن پارامەترلەر بەرىلىپ جاتىر جانە مۇنداي احۋال جىلۋ بەرۋ ماۋسىمىنىڭ سوڭىنا دەيىن جالعاساتىنى بولجانۋدا.توتەنشە جاعداي كەزىندە بولعان جەلىلەردەگى اقاۋلاردى جويدىق. كورسەتكىشتى جاقسارتۋ ءۇشىن جۇمىس ىستەپ جاتىرمىز. بىراق نەگىزگى جەلىلەردەگى لاي قازاندىقتارعا ءتۇسىپ، ەكراندى بەتكەيلەردە اينالىمدى بۇزدى»، - دەدى ول.

ۆاديم لەسيننىڭ ايتۋىنشا، قاڭتار ايى بويى جەو قىزمەتكەرلەرى مەن مەردىگەرلەر ستانتسيا جۇمىسىن تۇراقتاندىرۋمەن اينالىسقان. الايدا تۇراقتى پارامەترلەردى التى كۇن عانا ۇستاپ تۇرۋ مۇمكىن بولعان. قازىر جەو-دا 120-عا جۋىق ادام تاۋلىك بويى جۇمىس ىستەپ جاتىر.

سونداي-اق ءباسپاسوز ءماسليحاتىندا مونوپوليست وكىلى ءمالىم ەتكەندەي، ەكىباستۇز جىلۋ-ەلەكتر ورتالىعى كۇزگى-قىسقى كەزەڭگە دايىندىق پاسپورتىن الماعان.

«جوندەۋ جۇمىستارىن جىلىتۋ ماۋسىمى باستالعانعا دەيىن اياقتاۋ كەرەك بولعان، الايدا دەر كەزىندە اياقتاپ ۇلگىرمەگەن. سوندىقتان ستانتسيا قىسقى ماۋسىمعا دايىندىق تولقۇجاتىن المادى. ياعني، تولقۇجات بويىنشا جوندەۋ جۇمىستارى 30 قازانعا دەيىن اياقتالۋى ءتيىس دەگەن تالاپتار بار. ال بۇل جولى قاراشا ايىنىڭ سوڭىندا اياقتالدى، – دەدى ۆاديم لەسين.

ايتا كەتۋ كەرەك، قازىر ەكىباستۇز جەو-دا نەبارى ءتورت قازاندىق جۇمىس ىستەيدى، التاۋى جوندەۋدە. تەمپەراتۋرانىڭ شىعاتىن پارامەترى – 60 گرادۋس، كەرى اينالىمدا - 44. ەكىباستۇز تۇرعىندارىنا جىلۋ اقىسىنا 70 پايىز جەڭىلدىك جاسالدى.

Abai.kz