اۋىلدىڭ مۇڭىن قاشان ەستيسىز، اكىم مىرزا؟
قىزىلوردا وبلىسىنىڭ اكىمى نۇرلىبەك ماشبەكۇلى نالىباەۆ مىرزا نازارىنا!
قىزىلوردا وبلىسى، ارال اۋدانىنىڭ قاراتەرەڭ ەلدىمەكەنىنە قاتىستى جەدەل جاردەم كولىگىنىڭ ابدەن ەسكىرگەندىگى جونىندەگى ماسەلەنى الەۋمەتتىك جەلىدە كوتەرگەنىمە ءبىراز بولدى.
الدەقاشان ناقتى جاۋاپ بەرەر كەز بولعانىمەن، وكىنىشكە قاراي، مەن پاراقشامدا كوتەرگەن بۇل ماسەلەگە وبلىس اكىمدىگىنەن الىگە دەيىن ەشبىر مەملەكەتتىك قىزمەتكەر ناقتى جاۋاپ بەرمەدى. بۇل ءبىر!
اۋىل حالقى «قاراتەرەڭ اۋىلى» دەگەن الەۋمەتتىك جەلى پاراقشاسىندا وسى ماسەلەنى وقتىن-وقتىن كوتەرگەنىمەن، اۋداندىق اۋرۋحانا بۇعان قاتىستى شىعارىپ سالما جاۋاپ بەرگەن. بۇل ەكى!
ەندى ءسوزدىڭ توتەسىنە كوشسەك، جالپى حالىق ماسەلەسىن ناقتى شەشپەۋ پيعىلى-حالىق جاعدايىڭ ودان ءارى تىعىرىققا تىرەرى حاق. ويتكەنى شۇعىل مەديتسينالىق جاردەم كورسەتىلۋى قاجەت ءسابيدى ساپاسى سىن كوتەرمەيتىن جەدەل جاردەم كولىگى شامامەن 180 شاقىرىم قاشىقتىقتا ورنالاسقان اۋدان ورتالىعىنا بۇزىلماي جەتكىزەدى دەگەنگە ەش كەپىل جوق! بۇل رەتتە مىناعان نازار اۋدارعان ابزال!
جاقىندا عانا ەلورداداعى بيلىك وكىلى وزىنە ءبىر عانا وقۋشىنىڭ ادەبيەتكە قاتىستى جولداعان چەللەندجىنە جاۋاپ بەرىپ، وعان لەزدە ءۇن قاتتى. ال مەن تۇتاس اۋىلدىڭ دەنساۋلىعىنا قاتىستى وزەكتى ماسەلەنى ءبىرازدان بەرى قوزعاپ كەلەمىن. سالىستىرمالى تۇردە العاندا، وبلىستاعى جەكەلەگەن مەملەكەتتىك قىزمەتكەرلەر قاراتەرەڭ اۋىلى حالقىنىڭ جاڭا جەدەل جاردەم كولىگىڭ ۋاقىتىلى شەشۋگە ءالى قوزعالار ەمەس! قاشانعى اۋىل حالقى ەسكى جادەل جاردەم كولىگىمەن ازاپتى كۇي كەشەدى؟!
قاشانعى اۋىل حالقى ول جۇرمەي قالعاندا، جەكە يەلىكتى كولىكتى جالداۋعا ءماجبۇر بولادى؟! سوندىقتان اۋىل حالقى جاڭا جەدەل جاردەم كولىگىنىڭ بىزگە ناقتى قاشان بولىنەتىنىن ناقتى جاۋاپپەن بىلگىسى كەلەدى. كەنەتتەن ءبىر ءسابيدىڭ نەمەسە بوساناتىن انانىڭ ءحالى ناشارلاپ كەتسە، اناۋ توزىعى جەتكەن جەدەل جاردەم كولىگىمەن اۋدان ورتالىعىنا قالاي جەتكىزەدى؟
ءامىرحان الماعانبەتوۆ
Abai.kz
