"جايدارماننىڭ" نەگىزىن قالاۋشى ەسەن ەلەۋكەن پارلامەنت ءماجىلىسى دەپۋتاتتىعىنا ۇمىتكەرلىگىن ۇسىندى، - دەپ حابارلايدى Tengrinews.kz.

ەسەن ەلەۋكەن بۇنداي ماڭىزدى شەشىم اياقاستى قابىلدانا سالاتىن دۇنيە ەمەس ەكەنىن جانە بۇرىن دا تالاي ۇسىنىستار بولعانىن ايتتى

"بىراق ءوزىمدى دايىن ەمەسپىن دەپ باس تارتىپ كەلگەنمىن. الايدا قازىر ويلانىپ وتىرسام، جاستاردىڭ اراسىندا ءجۇرمىن دەگەنمەن، جاسىم، مىنە، بيىل ەلۋگە كەلەدى. جەر ورتاسىنا كەلدىم. ەندى جايدارماندا جيناعان تاجىريبەمدى، بىلىگىمدى جانە بار ىنتا-جىگەرىمدى كورسەتەتىن كەز كەلدى دەپ ويلايمىن. سوندىقتان، بۇرىن قوعامدىق قىزمەت رەتىندە اتقارعان جۇمىسىمدى جوعارى مەملەكەتتىك دەڭگەيگە كوتەرىلىپ، زاڭ جۇزىندە، جۇيەلى تۇردە كوتەرىپ، شەشەتىن ۋاقىت كەلگەن سياقتى", - دەدى ەسەن ەلەۋكەن.

ول ساياساتقا كەتسە دە، "جايدارمانمەن" بايلانىسىن ۇزبەيتىنىن ايتتى.

"جۇرگىزۋشى بولماسام دا، تۇراقتى تۇردە كەلەمىن. اعا رەتىندە اقىل-كەڭەسىمدى ايتىپ، قاداعالاپ وتىرامىن. ويتكەنى ءوزىم دە وسى قاۋىمنىڭ ءبىر مۇشەسىمىن دەپ ەسەپتەيمىن.

جالپى جايدارمان – تامىرىن جايىپ، ءوزىنىڭ جولى مەن باعىتىن ايقىنداعان، ەلىمىزدىڭ تۇپكىر-تۇپكىرىندە فيليالدارى بار، وزدىگىنەن سارتىلداپ جۇمىس ىستەپ تۇرعان جۇيە. "جايدارماننىڭ" ءبىر ەرەكشەلىگى - كرەاتيۆ يندۋستريانى قالىپتاستىردى. مادەنيەت سالاسىنىڭ كەز كەلگەن باعىتىنان ءبىزدىڭ جايدارمانشىلاردى تاباسىز. بۇدان بولەك وڭىرلەردە دەپۋتات بولعان دا، ۇلتتىق كومپانيالاردا باسشىلىق قىزمەتتە وتىرعان دا جايدارمانشىلار از ەمەس. ءبىر سوزبەن ايتقاندا، "جاڭا قازاقستاندا جاستار مۇناي بولسا، "جايدارمان" سول بايلىقتى يگەرىپ، وڭدەيتىن ۇلتتىق كومپانيا" دەپ سيپاتتار ەدىم", - دەيدى ەسەن ەلەۋكەن.

سونداي-اق، ول دەپۋتاتتىققا ۇمىتكەر بولۋىنا جاقىندارى مەن جايدارمانشىلاردىڭ پىكىرى دە اسەر ەتكەنىن ايتتى.

"ويتكەنى ولار بۇرىننان "دەپۋتات بولساڭىزشى" دەيتىن. جايدارمانشىلار دەگەنىمىز جاستار عوي، ال ولار وزدەرىنە قولجەتىمدى، كەز كەلگەن ۋاقىتتا بيلىككە ءوز ءۇنىن، داتىن جەتكىزە الاتىن ادامنىڭ پارلامەنت ءماجىلىسىنىڭ دەپۋتاتى بولعانىنا قۋاناتىنى انىق. سوندىقتان، بۇل شەشىمىمدى وزىمە سەنىپ وتىرعان قوعامنىڭ اماناتىن ارقالاۋ دەپ تۇسىنەمىن", - دەپ قورىتىندىلادى ەسەن ەلەۋكەن.

Abai.kz