تۇركيادا جەر سىلكىنىسىنەن زارداپ شەككەندەرگە كومەك رەتىندە «ساليقالى ۇرپاق» قوعامدىق قورىنىڭ اتىنان 500 000 دوللار اۋداردى. بۇل تۋرالى تۇركيانىڭ قازاقستانداعى توتەنشە جانە وكىلەتتى ەلشىسى ۋفۋك ەكيدجي مەن قور باسشىسىنىڭ ءوزارا كەزدەسۋىنەن كەيىن بەلگىلى بولدى. تاراپتار جەر سىلكىنىسىنەن كەيىنگى جاعدايدا «ساليقالى ۇرپاق» قورى باسقا دا قانداي كومەك كورسەتە الاتىنى جونىندە كەڭەستى.

«قيىن كەزەڭگە تاپ بولعان باۋىرلاس تۇركيا حالقىنا «ساليقالى ۇرپاق» قوعامدىق قورى قارجىلاي كومەك كورسەتۋ تۋرالى شەشىم قابىلدادى. ءبىز جەر سىلكىنىسىنەن زارداپ شەككەندەرگە 500 000 دوللار اۋداردىق. قاراجات العاشقى كەرەك-جاراق زاتتار مەن ءدارى-دارمەك ساتىپ الۋعا جانە وزگە دە قاجەتتىلىكتەر ءۇشىن جىبەرىلدى. باۋىرلارىمىز بەن اپكە-قارىنداستارىمىز باستارىنا تۇسكەن قيىنشىلىقتى كوپ ۇزاماي ەڭسەرسىن دەپ تىلەيمىز!» - دەدى قور ديرەكتورى قاسىم قاسابەكوۆ.

«ساليقالى ۇرپاق» قوعامدىق قورى 2016 جىلى قايىرىمدىلىق باعىتتا قۇرىلعان. ونىڭ ماقساتى حالىقتىڭ وسال توپتارىنا ءبىلىم بەرۋ جانە دەنساۋلىق ساقتاۋ سالالارىندا كومەكتەسۋگە نەگىزدەلگەن. وسى ۋاقىتقا دەيىن قور قايىرىمدىلىق ءىس-شارالار مەن اكتسيالارعا 1 ميلليارد تەڭگەگە جۋىق قارجى اۋدارعان. اتاپ ايتساق:

الماتى جانە الماتى وبلىسىنداعى مۇقتاج وتباسىلارعا 1000 نوۋتبۋك تاراتىلدى;

قازاقستان مۇسىلماندارى ءدىني باسقارماسىمەن بىرلەسە وتىرىپ، ەل بويىنشا 3 مەشىت سالىندى;

كوروناۆيرۋس ينفەكتسياسىمەن كۇرەسكە 150 ميلليون تەڭگە ءبولىندى;

ماقتاارال اۋدانىندا بولعان سۋ تاسقىنىنان زارداپ شەككەندەرگە 20 ءۇي تۇرعىزىلدى;

الماتى جانە الماتى وبلىسىنداعى مۇقتاج وتباسىلارعا 5 ءۇي مەن 5 پاتەر بەرىلدى;

«قازاقستان حالقىنا» الەۋمەتتىك قورىنا 1 ميلليارد تەڭگە اۋدارىلدى;

الماتى جانە الماتى وبلىسىنداعى كومەككە مۇقتاج جانە كوپبالالى وتباسىلارداعى 2 000 وقۋشىعا كانتسەلياريالىق زاتتارعا تولى ريۋكزاكتار تاراتىلدى;

2016 جىلدان بەرى قور باستاماسىمەن جەتىمدەرگە ارنالعان «بەرەكە ءۇيى» اشىلدى. بۇگىنگە دەيىن 70-تەن استام بالا تاربيەلەندى. «ساليقالى ۇرپاق» 5 جىلدان بەرى بالالارعا ارنالعان لاگەرلەردە قايىرىمدىلىق سپورتتىق-ساۋىقتىرۋ ءىس-شارالارىن وتكىزىپ كەلەدى. سونىمەن قاتار،  جىل سايىن الماتى جانە الماتى وبلىسى اكىمدىكتەرىمەن بىرلەسىپ، ءتۇرلى مادەني-ساۋىقتىرۋ باعىتىنداعى باستامالاردى ۇيىمداستىرادى.

ايتا كەتەيىك، قازاقستان پرەزيدەنتى قاسىم-جومارت توقاەۆ ۇكىمەتكە تۇركيا ەلىندەگى اپاتتى جەر سىلكىنىسىنەن زارداپ شەككەندەرگە جەدەل كومەك كورسەتۋ ءۇشىن 1 ميلليون دوللار قارجى ءبولۋدى تاپسىرعان ەدى. جالپى، قازىرگى ۋاقىتقا دەيىن قازاقستاندىقتار تۇركيا تۇرعىندارىنا كومەك رەتىندە 2 ميلليون 849 مىڭ 836 دوللار جينادى. بارلىق قاراجات AFAD رەسمي شوتىنا اۋدارىلدى.

Abai.kz