"ماحامبەت ابجانعا بوستاندىق!", "تاۋەلسىز جۋرناليستەرگە بوستاندىق!" دەگەن جازۋى بار پلاكات ۇستاعان ماقسات ءابجاننىڭ پيكەتى ساعات 12.30-دا باستالىپ، ەكى ساعاتقا جالعاستى. شارا ماڭگىلىك ەل كوشەسى بويىنداعى اقورداعا باراتىن جاياۋ جۇرگىنشىلەر جولاعى ماڭىندا ءوتتى. ماقساتتىڭ ءوزى سۇحبات بەرۋدەن باس تارتتى. ال جانىنداعى جەڭگەسى گۇلزيرا دۇسەمباەۆا اكتسياعا اكىمدىك رۇقسات بەرگەنىن جانە پيكەت بىرنەشە كۇن جالعاساتىنىن حابارلادى.

"اكتسيا بۇگىن باستالىپ، 3 ناۋرىزعا دەيىن جالعاسادى. كۇن سايىن ساعات 12.30-14.30 ارالىعىندا وسى جەرگە شىعامىز. جاعدايىمىزدى حالىق، مينيسترلىكتەردە ىستەيتىن مەملەكەتتىك قىزمەتكەرلەر بىلسە ەكەن دەيمىن. كوپشىلىك بىلگەنىن قالايمىز" دەدى ازاتتىققا ماحامبەت ءابجاننىڭ ايەلى.

دۇيسەباەۆانىڭ سوزىنشە، اكتسيا باستالعان كەزدە اكىمدىك قىزمەتكەرلەرى كەلىپ، ءجون سۇراپ، كەتىپ قالعان. ول ماڭايدى بىرنەشە پوليتسەي مەن قاراپايىم كيىم كيگەن ازامات الىستان باقىلاپ تۇرعانىن ايتتى. ازاتتىق ءتىلشىسى دە مينيسترلىكتەر ءۇيى عيماراتى ماڭىندا بىرنەشە ورگان قىزمەتكەرى تۇرعانىن بايقادى.

"ارى-بەرى وتكەن كىسىلەر "نە ىستەپ تۇرسىڭدار، بۇل كىم، نە ءۇشىن سوتتالعان؟" دەپ سۇرادى. ولارعا ماحامبەت كىم ەكەنىن، نەمەن اينالىسقانىن ايتىپ، تۇسىندىردىك. شىنىن ايتسام، جاعدايىمىز ورتاشا. بىراق سوڭىنا دەيىن كۇرەسۋگە ءازىرمىز. توعىز جىل دەگەن سۇمدىق قوي. ماحامبەتكە جانە باسقا دا تاۋەلسىز جۋرناليستەرگە بوستاندىق تالاپ ەتەمىز" دەدى گۇلزيرا دۇسەمباەۆا.

3 اقپاندا استانا سوتى جۋرناليست ماحامبەت ءابجاندى توعىز جىلعا باس بوستاندىعىنان ايىرۋ تۋرالى ۇكىم كەسكەن. ابجانعا "كورىنەۋ جالعان اقپارات تاراتۋ" (274-باپتىڭ 3-بولىگى) جانە "بوپسالاۋ" (194-باپتىڭ 4-بولىگى، 2-تارماعى) باپتارى بويىنشا ايىپ تاعىلعان. 39 جاستاعى جۋرناليست ءارى بلوگەر ماحامبەت ءابجاندى سىبايلاس جەمقورلىققا قارسى ءىس-قيمىل اگەنتتىگى بىلتىر 3 شىلدەدە تۇتقىنداعان. اگەنتتىك "ول ءبىر كاسىپكەردەن 50 ميلليون تەڭگە بوپسالادى" دەپ حابارلاعان. ءابجان ادۆوكاتى ارقىلى تاعىلعان ايىپتاردى جوققا شىعارعان.

2017 جىلى ماحامبەت ءابجان "الاياقتىق" بابى بويىنشا 3,5 جىلعا باس بوستاندىعىنان ايىرىلعان. 2019 جىلى شارتتى جازا الىپ، مەرزىمىنەن بۇرىن بوستاندىققا شىققان.

"جۋرناليستەردى قورعاۋ كوميتەتى" بىلتىر ۇكىمەتتى سىناپ جۇرگەن ءجۋرناليستىڭ ۇستالعانىنا الاڭداۋشىلىق ءبىلدىردى.

"شەكاراسىز تىلشىلەر" حالىقارالىق ۇيىمىنىڭ ء"سوز بوستاندىعى يندەكسىندە" قازاقستان 180 ەلدىڭ اراسىندا 122-ورىندا تۇر. ەلدە ءسوز بوستاندىعىنا قاتىستى احۋال كۇردەلى دەپ باعالانادى.

Abai.kz