ەلدەگى جىلۋ جۇيەسىنىڭ باستى پروبلەماسى وليگوپوليادان تۋىنداپ جاتىر. سەناتتىڭ ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتىنىڭ حاتشىسى سەرىك شايداروۆ وڭىرلەردى دامىتۋعا ارنالعان پارلامەنتتىك تىڭداۋدا وسىلاي دەدى.

«ەلوردانى دامىتۋ جونىندەگى كەڭەستە مەملەكەت باسشىسى استانا قالاسىندا جىلۋ ەنەرگياسىنىڭ تاپشىلىعى 300 گيگاكالوريادان اساتىنىن اتاپ ءوتتى. وسىنداي پروبلەما جەزقازعان، سەمەي، تاراز، پاۆلودار سياقتى قالالارعا دا ءتان.

بارلىق وسى پروبلەمالاردىڭ باستى سەبەپتەرىنىڭ ءبىرى – ول وليگوپوليا جانە جىلۋ مەن ەلەكتر ەنەرگەتيكاسى كاسىپورىندارىنىڭ اففيليرلەنۋى ەكەنىن اتاپ وتكىم كەلەدى.

جىلۋ ەلەكتر ورتالىعىنىڭ شامامەن 60%-ى (37-ءسىنىڭ 22-ءسى) جەكە مەنشىكتە، ولاردىڭ كوپشىلىگى 1990 جىلدارى جەكەشەلەندىرۋ بارىسىندا تىم ارزان باعامەن ساتىپ الىندى»، - دەدى ول.

سەناتوردىڭ سوزىنە قاراعاندا، قازاقستاندا وندىرىلەتىن ەلەكتر ەنەرگياسىنىڭ 64%-ى تەك 5 كومپانيا عا تيەسىلى.

«جوعارىدا اتالعان پروبلەمالاردى شەشۋ ءۇشىن ۇكىمەت «جىلۋ ەنەرگەتيكاسى تۋرالى» زاڭ جوباسىن ازىرلەدى.

بۇل قۇجات بىرقاتار ماڭىزدى نوۆەللالاردىڭ بولۋىنا قاراماستان، قازىرگى كۇردەلى جاعدايدى تۇزەتۋگە قاجەت شارالاردى قامتىمايدى. ياعني، وسى سالانىڭ بارلىق وزەكتى ماسەلەلەرىن شەشۋ باعىتىندا ناقتى زاڭنامالىق تۇسىنىك جوق.

ەنەرگەتيكا مينيسترلىگى اكىمدىكتەردىڭ جىلۋ ەنەرگەتيكاسىن دامىتۋدىڭ ماستەر-جوسپارلارىن ازىرلەۋ، تاريفتەردى كوتەرۋ جانە بيۋدجەت قاراجاتىن ءبولۋ ارقىلى جاعدايدى رەتتەۋگە تىرىسادى.

سوندىقتان ەل ەكونوميكاسىن مونوپولياسىزداندىرۋ قاجەتتىلىگىن ەسكەرە وتىرىپ، وسى زاڭ جوباسىن اعىمداعى سىن-قاتەرلەرگە بارىنشا بەيىمدەۋدى قامتاماسىز ەتۋ قاجەت دەپ سانايمىز»، - دەدى سەنات دەپۋتاتى.

Abai.kz