ءىىم كۇزەت قىزمەتىن باقىلاۋ دەپارتامەنتى باسشىسىنىڭ ورىنباسارى سەرىك قۇسپانوۆتىڭ ايتۋىنشا قازاقستاندا 3,2 مىڭنان اسا مەكتەپتە ماماندىرىلعان كۇزەت قىزمەتى جوق.

«بيىل 1 قاڭتارداعى جاعداي بويىنشا ءتيىستى ليتسەنزياسى بار كۇزەت ۇيىمدارى 3 404 مەكتەپ پەن 1 371 بالاباقشانى كۇزەتەدى. ونىڭ ىشىندە دابىل جۇيەسى (دابىل باتىرماسىن ورناتۋ) ارقىلى شامامەن 2 050 مەكتەپ پەن 790 بالاباقشا باقىلاۋدا. قالعان وبەكتىلەر كۇزەتشىلەر نەمەسە دابىل جۇيەسى ارقىلى كۇزەتىلەدى، - دەدى سەرىك قۇسپانوۆ ءىىم-دە وتكەن ءباسپاسوز ءماسليحاتىندا.

بۇگىندە قازاقستاندا 6 702 مەكتەپ جانە 5 585 بالاباقشا بار. بىراق بۇل ناقتى ساندار ەمەس، سەبەبى ءىىم ەسەپ جۇرگىزبەيدى ەكەن.

«بۇل ماسەلە بويىنشا وقۋ-اعارتۋ مينيسترلىگىنە حابارلاسۋ كەرەك. سونداي-اق دەرەكتەرگە سۇيەنسەك، بۇگىندە 3 298 مەكتەپ پەن 4 214 بالاباقشادا كۇزەت قىزمەتى جوق. قالعان وقۋ ورىندارى (جوعارى وقۋ ورىندارى مەن كوللەدجدەر) بويىنشا ستاتيستيكا جۇرگىزىلمەيدى»، - دەدى سەرىك قۇسپانوۆ.

سونداي-اق ول ءبىلىم وردالارىندا ليتسەنزيالانعان كۇزەتتىڭ سەبەبىنە جەرگىلىكتى اتقارۋشى ورگاندار، اكىمدىكتەر مەن وقۋ-اعارتۋ مينيسترلىگى جاۋاپ بەرۋگە ءتيىس ەكەنىن ايتتى.

Abai.kz