اقش پرەزيدەنتى دجوزەف بايدەن ۋكرايناعا ساپارىندا رەسەيدىڭ ءوزى باستاعان اگرەسسيالىق سوعىسىندا جەڭىلگەلى تۇرعانىن ءسوز ەتتى. بۇل تۋرالى «ەۆروپەيسكايا پراۆدا» حابارلادى.

اق ءۇيدىڭ قوجايىنى ءپۋتيننىڭ ۋكرايناعا باسىپ كىرگەسىن ءبىر جىلدان كەيىن جەڭىلىپ جاتقانىن، ونىڭ بۇل «باسقىنشىلىق سوعىستا ءوزى دە قۇريتىنىن، ەلىن دە كۇيرەتەتىنىن» ايتتى.

– پۋتين ۋكراينا ءالسىز، ال باتىس ءبولىنىپ كەتكەن دەپ ويلادى. بۇكىل الەمنىڭ كوز الدىندا تۇتاس ءبىر مەملەكەتتى وزىنە تىزەرلەتىپ قويماق بولدى. ءسويتىپ، بىزدەن اسىپ تۇسەمىن دەپ ويلادى. ال قازىر ول بۇلاي دەپ ويلامايدى دەپ ويلايمىن، – دەدى بايدەن ۋكراينا پرەزيدەنتى ۆلاديمير زەلەنكيمەن قاتارلاسىپ تۇرىپ.

ونىڭ ايتۋىنشا، پۋتين انىق قاتتى قاتەلەسكەن.

– ونىڭ دالەلى ارادا ءبىر جىل وتكەندە وسى جەردەن، وسى بولمەدەن كورىنىپ تۇر. ءبىز وسى جەردە ۋكراينا پرەزيدەنتىمەن بىرگە تۇرمىز، – دەدى بايدەن.

رەسەي سوعىس اشقان كەزدەن كەيىن بايدەننىڭ ۋكرايناعا ءبىرىنشى رەت كەلىپ تۇرۋىنىڭ ءوزى اقش-تىڭ ۋكراينا مەن ونىڭ حالقىنا جاساپ جۇرگەن قولداۋىنىڭ جالعاسىپ جاتقانىن تانىتاتىن سيمۆولدىق ءسات بولىپ وتىر.

دجو بايدەن ۋكراين حالقىنىڭ وزدەرىنە دەموكراتيانىڭ مانىنە جەتۋگە كومەكتەسكەندەرىن، وسى ارقىلى وزدەرىن ەرەكشە تۇرعىدا تانىتقاندارىن ايتتى.

اقش پرەزيدەنتى ءوز سوزىندە سوعىستىڭ باستالعان جانە رەسەي اسكەرلەرىنىڭ ۋكراينا شەكاراسىنىڭ ونە بويىنا ءۇيىلىپ-توگىلىپ كەلىپ جاتقانىن باقىلاپ وتىرعان الەمنىڭ ۇرەيگە بەرىلگەن شاعىن ەسكە ءتۇسىردى. سونداي-اق ول «رەسەي ۇشاقتارى اۋەگە كوتەرىلىپ، تانكتەرى شەكارانى كەسىپ ءوتىپ جاتقان» سول كەزدەردە ءوزىنىڭ زەلەنسكيمەن تەلەفونمەن قالاي سويلەسكەنىن ايتىپ بەردى.

– ءسىز ماعان ارت جاعىڭىزدا بولىپ جاتقان جارىلىستار داۋىسىن مەنىڭ ەستىگەن-ەستىمەگەنىمدى سۇرادىڭىز. مەن مۇنى ەشقاشان ۇمىتپايمىن، – دەپ مالىمدەدى ول.

ودان ءارى اقش پرەزيدەنتى زەلەنسكيمەن تەلەفونمەن اڭگىمەسىندەگى تاعى ءبىر جايتتى ەسكە الدى.

– سول كەزدە مەن سىزگە الەم انە-مىنە دەگەنشە وزگەرەدى. الەم ليدەرلەرىن جيناڭىز. ولاردان ۋكرايناعا قولداۋ كورسەتۋدى سۇراڭىز. ءسىز ءبىزدىڭ ەندى تاعى قاشان اڭگىمەلەسە الاتىنىمىزدى بىلمەيتىنىڭىزدى ايتتىڭىز. ءبىر جىل بۇرىن سول قاراڭعى ءتۇنى بۇكىل الەم شىن مانىندە كيەۆتىڭ قۇلاۋىنا دايىندالىپ وتىردى. بالكي، ۋكراينانىڭ دا اقىرى جەتۋىن كۇتكەن شىعار. ارادا ءبىر جىل ءوتتى، كيەۆ ورنىندا تۇر. ۋكراينا دا ورنىندا. دەموكراتيا ورنىندا، امەريكالىقتار، الەم سىزدەرمەن بىرگە تۇر، – دەدى ول.

بايدەن سونداي-اق كيەۆ «جۇرەگىنىڭ ءبىر بولىگىن جاۋلاپ العانىن» ايتتى.

اقش پرەزيدەنتى دجو بايدەن كيەۆكە ساپارى بارىسىندا قۇراما شتاتتار اتىنان 500 ملن دوللار تۇراتىن اسكەري كومەكتىڭ جاڭا پاكەتى بەرىلەتىنىن جانە رەسەيگە اگرەسسياسى ءۇشىن قوسىمشا سانكتسيالار جاسالعالى جاتقانىن دا مالىمدەدى. سونداي-اق جاپونيا پرەمەر-ءمينيسترى فۋميو كيسيدا ۋكرايناعا 5,5 ملرد دوللار كولەمىندە قارجىلاي قولداۋدىڭ جاڭا پاكەتى ۇسىنىلعانىن جاريالادى.

وسى كۇنى كيەۆتە، جوعارعى رادا جانىنداعى باتىلدىق اللەياسىندا اقش پرەزيدەنتى دجوزەف بايدەنگە ارنالعان قالاقشا ورناتىلدى. وسى راسىمگە قاتىسقان مارتەبەلى مەيمان ارتىنان ەلىنە ۇشىپ كەتتى.

Abai.kz