قر پرەمەر-ءمينيسترىنىڭ ورىنباسارى – ساۋدا جانە ينتەگراتسيا ءمينيسترى سەرىك جۇمانعارين مەن ءور پرەمەر-ءمينيسترىنىڭ ورىنباسارى جامشيد حودجاەۆ قازاقستان پرەزيدەنتىنىڭ جەلتوقسانداعى وزبەكستانعا ساپارى اياسىندا قول قويىلعان ينۆەستيتسيالىق كەلىسىمدەر مەن ساۋدا كەلىسىم-شارتتارىن ىسكە اسىرۋدى تالقىلادى، دەپ حابارلايدى primeminister.kz.

قازاقستان مەن وزبەكستان شەكاراسىندا «ورتالىق ازيا» حالىقارالىق ونەركاسىپتىك ىنتىماقتاستىق ورتالىعىن قۇرۋ قولعا الىنىپ وتىر.

نىساندى «اتامەكەن» (قازاقستان) جانە «گۇلستان» (وزبەكستان) حالىقارالىق وتكىزۋ بەكەتتەرىنىڭ ايماعىندا سالۋ بولجانىپ وتىر.

«ينۆەستيتسيالىق كەلىسىمگە قول قويۋدى جەدەلدەتەتىن بولامىز. جوباعا ەلەۋلى قىزىعۋشىلىق كۇتىلۋدە»، — دەدى سەرىك جۇمانعارين كووپەراتسيالىق جوبالاردىڭ ىسكە اسىرىلۋ بارىسىنا مونيتورينگ جۇرگىزۋ جانە يمپورتتى الماستىرۋ بويىنشا جۇيەلى جۇمىس جۇرگىزۋ جونىندەگى جۇمىس توبىنىڭ ءبىرىنشى وتىرىسىنا قاتىسۋشىلارعا.

قر ۆيتسە-پرەمەرى وزبەك سەرىكتەستەرىنە قىرعىزستانمەن شەكارادا وسىنداي ساۋدا-لوگيستيكالىق حاب سالۋ تۋرالى ايتىپ، وزبەكستاننان كەلگەن ينۆەستورلار مەن كاسىپكەرلەردى وسى جوباعا قاتىسۋعا شاقىردى.

ءوز كەزەگىندە وزبەكستان پرەمەر-ءمينيسترىنىڭ ورىنباسارى جامشيد حودجاەۆ ونى بىرلەسىپ ىسكە اسىرۋعا قىزىعۋشىلىق ءبىلدىردى.

سونداي-اق كەزدەسۋدە تاراپتار الماستىرىلاتىن ءونىمدى جۇيەلى جەتكىزۋدى ۇيىمداستىرۋ ءۇشىن بىرلەسكەن سىرتقى ساۋدا كومپانياسىن قۇرۋ تۇجىرىمداماسىن بەكىتتى. جۇمىس توبىنىڭ قاتىسۋشىلارى ەنەرگەتيكا، كولىك، اۋىل شارۋاشىلىعى، ەلەكتروتەحنيكا ونەركاسىبى جانە ماشينا جاساۋ، ينفراقۇرىلىمدىق قۇرىلىس، فارماتسەۆتيكا، حيميا سالالارى سالاسىنداعى كووپەراتسيالىق جانە ينۆەستيتسيالىق جوبالاردىڭ ورىندالۋىن قاراستىردى. ىسكە اسىرۋ بارىسىندا ولاردىڭ كەيبىرەۋلەرى وزگەرىستەر ەنگىزۋدى تالاپ ەتتى.

كووپەراتسيالىق جوبالاردىڭ ىسكە اسىرىلۋ بارىسىنا مونيتورينگ جۇرگىزۋ جانە يمپورتتى الماستىرۋ بويىنشا جۇيەلى جۇمىس جۇرگىزۋ جونىندەگى قازاق-وزبەك جۇمىس توبىنىڭ كەلەسى وتىرىسى 2023 جىلعى ناۋرىزدا شىمكەنتتە وتەدى.

Abai.kz