شەشەن رەسپۋبليكاسىنىڭ باسشىسى رامزان قادىروۆ ءوز-ءوزىن «شەشەنستان باتىرى» اتاعىمەن ماراپاتتاپ، ونىڭ مەدالىن الدى، دەپ جازدى HalyqUni.

تاسس اگەنتتىگىنىڭ حابارلاۋىنشا، رامزان كادىروۆ «شەشەن رەسپۋبليكاسىنىڭ باتىرى» اتاعىن وتكەن جىلدىڭ قاراشا ايىندا بەلگىلەگەن ەكەن.

مەدالدى تاپسىرۋ ءراسىمى رەسەيدىڭ وتان قورعاۋشىلارى كۇنىنە ارنالعان ءىس-شارا اياسىندا بولدى.

اتاقتى بەرۋ تۋرالى ەرەجەگە سايكەس، ول «قاھارماندىق ەرلىك» جاساعاندارعا بەرىلۋگە ءتيىس. بىراق كادىروۆتىڭ بۇل اتاقتى الاتىنداي قانداي ەرلىك جاساي قويعانى ايتىلمايدى.

ءسىزدى رەسپۋبليكانىڭ جوعارى ماراپاتى – شەشەن رەسپۋبليكاسىنىڭ №1 باتىرى اتاعىن الۋىڭىزبەن شەشەن رەسپۋبليكاسى پارلامەنتىنىڭ دەپۋتاتتارى اتىنان جانە جەكە ءوزىمنىڭ اتىمنان شىن جۇرەكتەن قۇتتىقتايمىن! ءسىزدىڭ شەشەن رەسپۋبليكاسى مەن رەسەي فەدەراتسياسى الدىنداعى ەڭبەكتەرىڭىزدى باعالاماۋ مۇمكىن ەمەس. ولار ەشبىر اسىرىپ ايتپاعاندا، ارنايى زەرتتەۋگە لايىق، – دەدى پارلامەنتتىڭ توراعاسى ماگومەد داۋدوۆ.

«لورد» دەگەن لاقاپ اتى بار ماگومەد داۋدوۆ «شەشەنستان باتىرى» اتاعىنىڭ يەگەرىنە ارنايى جەڭىلدىكتەر مەن اقشالاي تولەم بەرىلەتىنىن دە ەسكەرتتى.

«شەشەن رەسپۋبليكاسىنىڭ باتىرى» مەدالى – 750-ءشى ولشەمدى 70 گرامم التىننان دايىندالعان سەگىز بۇرىشتى جۇلدىز. ونىڭ نەگىزگى بولىگىنىڭ جوعارعى جاعىندا «باتىر» دەگەن ماعىنا بەرەتىن «كوناح» دەگەن ءسوز جازىلعان. ال تومەنگى جاعىن «اللاحۋ اكبار. احمات دەگەن – كۇش» دەگەن ۇران بەزەندىرىپ تۇر. ناگرادانىڭ كەلەسى بەتىنەن «شەشەن رەسپۋبليكاسىنىڭ باتىرى» دەگەن جازۋدى وقۋعا بولادى.

العاشقى كەزدە مەدال ۋكرايناداعى سوعىستا «كوزگە تۇسكەن» جاۋىنگەرلەرگە بەرىلەدى دەپ جوسپارلانعان ەكەن. الايدا ۋكراين جەرىنە بارعان شەشەندەر ودان گورى جەرگىلىكتى جۇرتقا زورلىق-زومبىلىق جاساۋمەن، حالىقتى توناۋمەن، سونداي-اق العى شەپتەن الىستا ءجۇرىپ، تيك-توك تۇسىرۋمەن كوبىرەك تانىلىپ كەتكەننەن كەيىن «تازا سوعىسقان» ەشكىمدى تاپپاعاسىن سوڭ، رامزان كادىروۆ ەڭ الدىمەن ءوزىن «ناگرادتاي» سالۋعا شەشىم قابىلداعان سياقتى.

Abai.kz