اۋىل شارۋاشىلىعى ءمينيسترى ەربول قاراشوكەەۆ بريۋسسەلگە ساپارى اياسىندا ەۋروپالىق كوميسسارلارمەن كەزدەستى. بۇل تۋرالى اۋىلشارۋاشىلىق مينيسترلىگى حابارلادى.

ەربول قاراشوكەەۆ اۋىل شارۋاشىلىعى جونىندەگى ەۋروكوميسسار يانۋش ۆويتسەحوۆسكيمەن كەلىسسوزدەر بارىسىندا ەل ۇكىمەتىنىڭ ەو-مەن ساۋدا-ەكونوميكالىق ارىپتەستىكتى ودان ءارى كەڭەيتۋگە دايىندىعىن اتاپ ءوتتى.

قازاقستان جوعارى ساپالى ورگانيكالىق ازىق-تۇلىك جەتكىزۋشىسى بولۋ ءۇشىن بارلىق مۇمكىندىكتەرگە يە، دەپ اتاپ ءوتتى ەربول قاراشوكەەۆ. اتاپ ايتقاندا، وتاندىق بالىق ونىمدەرىن ەۋرووداق ەلدەرىنە ەكسپورتتاۋ تۋرالى ءسوز بولدى. ءتيىستى كەلىسسوزدەر پروتسەستەرى اياقتالۋدا، فرانتسيا جانە شۆەيتساريامەن قازاقستاندىق بالىق ونىمدەرىن ساتىپ الۋعا كوممەرتسيالىق ۋاعدالاستىقتار بار. ايتا كەتەيىك، وتكەن جىلدىڭ قورىتىندىسى بويىنشا قازاقستاندىق بالىقتىڭ ەو ەلدەرىنە ەكسپورتى 1,5 ەسەگە ارتىپ، 8,7 مىڭ توننانى قۇرادى. نەگىزگى تۇتىنۋشىلار پولشا، سلوۆاكيا، چەحيا، نيدەرلاندى، ليتۆا، لاتۆيا، دانيا، اۆستريا جانە گەرمانيا بولدى.

سونداي-اق ەلىمىز ەۋروپالىق نارىققا بال، جىلقى ەتى، سيىر ەتى مەن ءسۇت ونىمدەرىن جەتكىزە الادى.

ەۋروكوميسسار ستەللا كيرياكيدەسپەن كەزدەسۋ بارىسىندا قازاقستان مەن ەو ەلدەرى اراسىنداعى ساۋدانى دامىتۋدىڭ وزەكتى ماسەلەلەرى تالقىلاندى.

اتاپ ايتقاندا، بيىلعى جىلى كۇشىنە ەنگەن ميكروبقا قارسى پرەپاراتتاردى پروفيلاكتيكالىق ماقساتتا قولدانۋعا تىيىم سالۋ تۋرالى ەۋروپالىق زاڭناماعا ەنگىزىلگەن وزگەرىستەر ەۋروپالىق مەملەكەتتەردەن قازاقستانعا اسىل تۇقىمدى مالدى ەكسپورتتاۋ كەزىندە قيىندىقتار تۋعىزادى، دەپ اتاپ ءوتتى ەربول قاراشوكەەۆ. وسى ماسەلەنى رەتتەۋ ءۇشىن مينيستر ەكىجاقتى ۆەتەريناريالىق سەرتيفيكاتتارعا وزگەرىستەر ەنگىزۋدى ساراپتامالىق دەڭگەيدە پىسىقتاۋدى ۇسىندى. اشم باسشىسى سونداي-اق قازاقستانعا جانۋارلار اۋرۋلارىنىڭ اكەلىنۋ قاۋپىن ازايتۋ بويىنشا بىرلەسكەن شارالاردى ازىرلەۋ قاجەتتىگىن اتاپ ءوتتى. مال شارۋاشىلىعىن دامىتۋدىڭ ءتۇرلى باعدارلامالارى اياسىندا ەلگە ەۋروپالىق وداق ەلدەرىنەن 57 مىڭ اسىل تۇقىمدى مال اكەلىندى.

ايتا كەتەيىك، قر سىرتقى ساۋداسىنىڭ شامامەن 30% ەو-نىڭ ۇلەسىنە تيەسىلى. 2022 جىلدىڭ قورىتىندىسى بويىنشا اۋىل شارۋاشىلىعى ءونىمىنىڭ تاۋار اينالىمى 35,6% ءوسىپ، 995,5 ملن دوللاردى قۇرادى. قازاقستاندا زىعىر، بيداي، راپس جانە وڭدەلگەن ءداندى داقىلداردىڭ ەكسپورتى ۇلعايدى.

Abai.kz