بۇگىن سەناتتىڭ جالپى وتىرىسىندا «2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ قابىلداندى.

قاراستىرىلىپ وتىرعان حاتتاماعا 2021 جىلعى 8 اقپاندا ەاەو-عا مۇشە مەملەكەتتەردىڭ باسشىلارى قول قويدى. حاتتاما ەاەو-عا مۇشە مەملەكەتتەردىڭ تاۋارلارىنا جانە ەاەو-عا مۇشە ەمەس مەملەكەتتەردىڭ تاۋارلارىنا قاتىستى رەسەي فەدەراتسياسىنىڭ اەا-سىندا قوسىلعان قۇن سالىعىن الۋدىڭ تەڭ شارتتارىنا قول جەتكىزۋدى قامتاماسىز ەتۋگە مۇمكىندىك بەرەدى.

«حاتتاما اياسىندا ەاەو تۋرالى شارتقا رەسەي فەدەراتسياسىنىڭ جەكەلەگەن ارنايى ەكونوميكالىق ايماقتارىندا سالىق سالۋ بولىگىندە وزگەرىستەر ەنگىزىلەدى. جالپى، ەاەو تۋرالى شارتتا ونىڭ جۇمىس ىستەۋىنىڭ جانە مۇشە مەملەكەتتەردىڭ، ونىڭ ىشىندە سالىق سالۋ ماسەلەلەرى بويىنشا ءوزارا ءىس-قيمىلىنىڭ نەگىزگى قاعيداتتارى بەكىتىلگەن. اتاپ ايتقاندا، جاناما سالىقتاردى ءوندىرىپ الۋ ءتارتىبى جانە ولاردى مۇشە مەملەكەتتەردىڭ ءوزارا ساۋداسىندا تولەۋ تەتىگى شارتتىڭ №18 قوسىمشاسىندا قامتىلعان. مۇشە مەملەكەتتەردىڭ ارنايى ەكونوميكالىق ايماقتارىنا تاۋارلاردى يمپورتتاۋ كەزىندە ەركىن كەدەن ءراسىمى قولدانىلادى»، - دەدى قر پرەمەر-ءمينيسترىنىڭ ورىنباسارى – قارجى ءمينيسترى ەرۇلان جاماۋباەۆ.

وسى ورايدا ەاەو-نىڭ كەدەن كودەكسىنىڭ 201-بابىنىڭ 1-تارماعىنا سايكەس، تاۋارلار ارنايى ەكونوميكالىق ايماقتارىندا كەدەندىك باجداردى، سالىقتاردى جانە باسقا دا وتەماقى باجدارىن تولەمەي ورنالاستىرىلادى جانە پايدالانىلادى.

«الايدا ەاەو-نىڭ كەدەن كودەكسىنىڭ 455-بابىنىڭ 6-تارماعىنا سايكەس، رەسەي فەدەراتسياسىنىڭ 3 ارنايى ەكونوميكالىق ايماعىندا مۇشە ەلدەردىڭ اۋماعىنان يمپورتتالاتىن تاۋارلار بويىنشا كەدەندىك باجدار مەن سالىقتار بىردەن تولەنەدى. ال ءۇشىنشى ەلدەردەن يمپورتتاعان كەزدە، كەدەندىك باجدار مەن سالىقتار تولەنبەيدى. بۇل تۇرعىدا وسى ايماقتاردا كاسىپكەرلەر ءۇشىن ەاەو-نىڭ ەلدەرىنەن گورى ءۇشىنشى ەلدەردەن تاۋارلاردى يمپورتتاۋ تيىمدىرەك. ءوز كەزەگىندە، حاتتاما نورمالارى اتالعان ارنايى ەكونوميكالىق ايماقتارعا ەاەو-دان جانە ءۇشىنشى ەلدەردەن تاۋارلاردى يمپورتتاۋ كەزىندە تەڭ جاعدايلار جاساۋعا مۇمكىندىك بەرەدى»، - دەدى قارجى مينيستر.

اتاپ ايتقاندا، حاتتاما ەاەو ەلدەرىنەن يمپورتتالعان تاۋارلار بويىنشا كورسەتىلگەن ايماقتاردا 180 كۇن ىشىندە كەيىنگە قالدىرا وتىرىپ، قوسىلعان قۇن سالىعىن تولەۋدى كوزدەيدى.

Abai.kz