استانادا زاڭسىز سالىنعان 76 قۇرىلىس نىساننىڭ جۇمىسى توقتاتىلدى. بۇل تۋرالى استانا قالاسىنىڭ اكىمدىگى حابارلادى.

قالا اۋماعىندا رۇقسات قۇجاتتارى جوق 96 نىساننىڭ قۇرىلىسى جۇرگىزىلگەن. كوپپاتەرلى تۇرعىن ءۇي كەشەنى نىساندارىن ءوز بەتىنشە سالۋ ماسەلەسى جونىندەگى جۇمىس توبى زاڭسىز قۇرىلىس سالۋ فاكتىلەرىن انىقتاپ قانا قويماي، رۇقسات قۇجاتتارى جوق قۇرىلىس سالۋشىلارعا جان-جاقتى كومەك كورسەتەدى. وسىلايشا، 96 نىساننىڭ 20-سى قۇرىلىس جۇرگىزۋىنە قاجەتتى رۇقسات قۇجاتتارىن تولىقتاي الدى. جۇمىس توبىنىڭ قۇرامىنا مەملەكەتتىك ورگانداردىڭ قىزمەتكەرلەرى، قوعامدىق ۇيىمداردىڭ، قازاقستان قۇرىلىسشىلار وداعىنىڭ جانە قازاقستاننىڭ قۇرىلىس سالۋشىلار قاۋىمداستىعىنىڭ وكىلدەرى كىرەدى.

قازىرگى ۋاقىتتا رۇقسات قۇجاتتارىنسىز قۇرىلىسى ءجۇرىپ جاتقان 76 نىسان انىقتالدى. ولاردىڭ قاتارىندا: «Mars Project» جشس، «Aiz Kurylys» جشس، «رۋسالدينگ Line» جشس، «بيلدينگ كومپاني» جشس، «Expert Consulting Agency Kazakhstan» جشس، «تاۋەكەل ينجينيرينگ» جشس، «Global Millennium» جشس، «Handan-Astana» جشس، «Oreol-Group» جانە ت.ب.

رۇقسات قۇجاتتارىنسىز قۇرىلىس جۇرگىزەتىن سۋبەكتىلەردىڭ بارىنە جۇمىسىن توقتاتۋ تۋرالى نۇسقاما بەرىلەدى ءارى اكىمشىلىك جاۋاپكەرشىلىككە تارتىلدى. سونداي-اق ءتيىستى جەر قۇقىعىنسىز قۇرىلىسى ءجۇرىپ جاتقان 20 وبەكت (76 وبەكتىنىڭ ىشىندە) بويىنشا سوت ورگاندارىنا دەمونتاجداۋ بويىنشا تالاپ ارىزدار بەرىلەتىن بولادى.

Abai.kz